अखबार नेपाल ट्रेन्डिङ

फेसबुक स्वामित्वको लोकप्रिय एप इन्स्टाग्रामले आफ्नो १०औँ वर्षगाँठको अवसरमा प्रयोगकर्ताहरुका लागि केही नयाँ फिचरहरु थप गरेको छ ।

इन्स्टाग्राममा थपिएका नयाँ फिचरमा Stories Map लगायतका फिचर छन् । त्यस्तै आपत्तिजनक कमेन्टहरु हाइड गर्ने तथा चेतावनी संकेतलाई विस्तार गर्ने फिचरमा पनि इन्स्टाग्राममा थपिएको छ ।

इन्स्टाग्रामले गोपनीयता फिचरको रुपमा थप गरेको नयाँ फिचरले आपत्तिजनक कमेन्टहरु लुकाइदिने बनाउँदछ । त्यसरी स्वचालित रुपमा हाइड भएका कमेन्टहरु हेर्नका लागि View Hidden Comments अप्सनमा ट्याप गर्नु पर्नेछ ।

इन्स्टाग्रामले थप गरेको Nudge Warnings फिचरले इन्स्टाग्राम प्रयोगकर्ताहरुलाई आपत्तिजनक कमेन्ट गरिरहँदा चेतावनी सन्देश पठाउँदछ । यसले गलत तथा आपत्तिजनक टिप्पणी गर्न चाहनेहरुलाई निरुत्साहित गर्ने र आपत्तिजनक शव्द सच्चाउनका लागि प्रयोगकर्ताहरुलाई उत्प्रेरित गर्ने बताइएको छ ।

यसबाहेक इन्स्टाग्राममा अरु १० वटा निकै उपयोगी फिचरहरु थप गरिँदैछ । त्यसमा सेल्फी स्टिकर, इमोजी, वाच टुगेदर तथा भ्यानिस मोड लगायतका रहेका छन् । भ्यानिस मोड यस्तो फिचर हो जहाँ कसैलाई पठाएको मेसेज प्रापकले हेरिसकेपछि आफै हराउनेछ ।

यसैबीच फेसबुकले इन्स्टाग्रामको डाइरेक्ट मेसेज सर्भिसलाई फेसबुकको मेसेन्जर प्लाटफर्मसँग मर्ज गर्ने घोषणा गरेको छ ।