अखबार नेपाल ट्रेन्डिङ

कार्तिक ४ गते सशस्त्र प्रहरी बल, नेपाल र नेपाल प्रहरीको संयुक्त टोलीले सुनसरीबाट विभिन्न प्रकारका लागूऔषधसहितको मोटरसाइकलसहित लागूऔषध बरामद गरेको थियो । लागूऔषधसहितको मोटरसाइकल बरामदपछि अहिले सामाजिक सञ्जालमा सुरक्षाकर्मीलाई दोषी देखाउन अनेक प्रयास भएका छन् ।

सशस्त्र प्रहरी बल, नेपाल नं. ४ गण सुनसरीबाट खटिएको टोलीले बिशेष सूचनाको आधारमा कार्तिक ४ गते अन्दाजी २:३० बजेको समयमा सुनसरी जिल्ला भोक्राह नरसिंह गाउँपालिका-४ स्थित नहरचोकदेखि अन्दाजी ५० मिटर उत्तर-पूर्वतर्फ प्र.१ ०२-०४७ प १४७२ नं. को मोटरसाइकल पछ्याउने क्रममा पार्क गरी राखिएको अवस्थामा भेटिएको थियो । चालक फेला नपरेपश्चात् मोटरसाइकललाई १५-२० मिटर दक्षिणतर्फ पूर्व-पश्चिम राजमार्गमा निकालेर संयुक्त टोलीले चेकजाँच गरेको थियो ।

सशस्त्र प्रहरी बल, नेपालका सह-प्रवक्ता सशस्त्र प्रहरी नायब उपरीक्षक शैलेन्द्र थापाका अनुसार त्यसपश्चात् एक्कासी ५०-५५ जना स्थानीय व्यक्तिहरु भेला जम्मा भई ड्युटीलाई बाधा पार्दै लागूऔषध लुटपाट र खोजी दसी प्रमाण नष्ट गर्ने प्रयास गरेका थिए । सोही क्रममा सुरक्षाकर्मीको मिलोमतोमा फसाएको भन्ने जस्तो अफवाह फैलाउन शुरु गरेका हुन् । उक्त लागूऔषध लुटपाट गर्ने र दसी प्रमाण नष्ट गर्न खोज्दा भुइँमा खसेको कालो प्लाष्टिकको लागूपदार्थ सुरक्षाकर्मीले टिपेर मोटरसाइकलको सोही स्थानमा राखेका थिए । सोही भिडियोलाई गलत व्याख्या गर्दै सामाजिक सञ्जालमा भ्रम सिर्जना गर्ने कार्य भएको हो ।

चेकजाँचका क्रममा प्रतिबन्धित लागूऔषध नाइट्रोजन ट्याब्लेट १० पत्ता, ट्रामाडोल १६ पत्ता र अन्य लागूपदार्थ ४ फेला परेको थियो । उक्त मोटरसाइकल र लागूऔषध नियन्त्रणमा लिई आवश्यक कारबाहीका लागि जिल्ला प्रहरी कार्यालय सुनसरीमा बुझाइएको थियो । जिल्लामा पछिल्लो समय लागूऔषध तथा तस्करी नियन्त्रणमा सुरक्षाकर्मीहरू निर्मम ढङ्गले परिचालित हुँदा उनीहरूको मनोबल गिराउन एवं आमजनमानसमा भ्रम पैदा गर्न घटनालाई लिएर अतिरञ्जित प्रचार-प्रसारसमेत हुने गरेको लागूऔषध तथा तस्करीबाट आजित स्थानीयहरु नै बताउँछन् ।