अखबार नेपाल ट्रेन्डिङ

काठमाडौ: डेनमार्कलाई ४-२ गोल अन्तरले पराजित गर्दै बेल्जियम युइएफए नेशन्स लिग फुटबलको फाइनल पुगेको छ ।

गएराति भएको खेलमा घरेलु मैदानमा रामेलु लुकाकु चम्किएपछि बेल्जियमले शानदार जित निकालेको हो ।

बेल्जियमको जितमा लुकाकुले २ गोल गरे भने यूरी टिएल्मन्स र केविन डी ब्रुयनाले १-१ गोल गरे ।

खेलको तीन मिनेटमै यूरीले गोल गर्दै बेल्जियमलाई सुरुवाती अग्रता दिलाएका थिए ।

खेलको १७औँ मिनेटमा डेनमार्कका जोनास विण्डले बराबरी गोल फर्काए ।

पहिलो हाफ १-१ को बराबरीमा टुंगियो । बेल्जियमका लागि दोस्रो हाफको ५७ र ६९औँ मिनेटमा लुकाकुले दुई गोल गर्दै अग्रता दोब्बर बनाए ।

खेलको ८६औँ मिनेटमा बेल्जियमका नासर चाड्लीले आत्मघाती गोल गरे ।

खेलको ८७औं मिनेटमा बेल्जियमका लागि डी ब्रूयनाले गोल गर्दै ४-२ को जित निश्चित गरेका हुन् ।

यस्तै इटालीले बोसनिया हर्जगोभिनालाई २-० ले पराजित गर्दै ग्रुप १ मा शिर्ष स्थानमा रहँदै फाइनलमा आफ्नो स्थान सुरक्षित गरेको हो ।

त्यस्तै ग्रुप २ बाट बेल्जियम शिर्ष स्थानमा रहँदै फाइनलमा पुगेको छ ।

योसँगै लिगको फाइनल समीकरण पूरा भएको छ । गएराति लिग चरणका खेल सकिएसँगै फाइनल खेल्ने चार टीमको टुंगो लागेको हो ।

चार समुहका विजेता टिम बेल्जियम, फ्रान्स, इटाली र स्पेन फाइनल पुगेका छन् ।