अखबार नेपाल ट्रेन्डिङ

काठमाडौं: नेपाली फाइटर रवीन्द्र ढाँट रोड टु युएफसी सिजन–५ को फाइनलमा पुगेका छन् । यो उनको मिक्स मार्सल आर्ट्स (एमएमए) करिअरकै सर्वाधिक ठूलो प्रतिस्पर्धामा हो । चीनको साङ्घाईस्थित अक्टागनमा उनले आज भएको सेमिफाइनलमा न्युजिल्यान्डका फाइटर कासिब मर्डोकलाई पराजित गरेका हुन् ।

तीन राउनन्डको खेलमा ‘स्प्लिट डिसिजन’को आधारमा ढाँट २९–२८ को स्कोरमा विजयी भएका हुन् । उनी फाइनल पुगेसँगै फाइट निकै कठिन भएको बताए । ‘नेपालमा दुखमा रहेको भन्दै सबैले सकेसम्मको सहयोग गर्नुहोला, जय नेपाल । यो फाइट कठिन थियो,’ उनले भने । यदि उनले फाइनलसमेत जित्न सके प्रतिष्ठित एमएमए संस्था युएफसीसँग व्यावसायिक सम्झौता गर्ने अवसर पाउनेछन् ।