अखबार नेपाल ट्रेन्डिङ

आन्तरिक शान्ति-सुरक्षासँगै प्रमुख कार्यादेशमध्येको राजस्व चुहावट नियन्त्रणमा सशस्त्र प्रहरी बल, नेपालले आर्थिक वर्ष २०८२/०८३ मा उल्लेखनीय सफलता प्राप्त गरेको तथ्याङ्कहरुले देखाएका छन् । काबिल कमाण्डर मानिएका निवर्तमान सशस्त्र प्रहरी महानिरीक्षक राजु अर्यालले आर्थिक अनुशासन र राजस्व चुहावट नियन्त्रणमा निर्मम बन्न सम्बन्धित कमाण्डरहरुलाई बारम्बार अह्राउँदै आएका थिए भने वर्तमान सशस्त्र प्रहरी महानिरीक्षक नारायणदत्त पौड्यालले शून्य सहनशीलताको नीतिलाई कडाइका साथ लागू गर्न अह्राइरहेका छन् ।

त्यसैको परिणाम हो, राजस्व चुहावट नियन्त्रणमा आर्थिक वर्ष २०८२/०८३ मा सशस्त्र प्रहरी बल, नेपाललाई मिलेको उल्लेख्य सफलता । गल्ती गर्ने कमाण्डरलाई तत्काल मुख्यालय झिकाएर कारबाही प्रक्रिया अगाडि बढाउने र राम्रो काम गर्ने कमाण्डरलाई पुरस्कृत गर्ने नीति सशस्त्र प्रहरी बल, नेपालले लिएकै छ । जसका कारण कमाण्डरहरुलाई कर्तव्यबोधले बारम्बार झकझक्याइरहेको हुनुपर्छ ।

यसैबीच सशस्त्र प्रहरी बल नेपाल नं. १ बराह बाहिनी मुख्यालय, सुनसरीले आर्थिक वर्ष २०८२/०८३ मा ३० करोड ३ लाख ३३ हजार ८ सय ४९ रुपैयाँ बराबरको चोरी-पैठारी तथा निकासीको सामान बरामद गरी राजस्व तथा भन्सार कार्यालयमा बुझाएको सशस्त्र प्रहरी नायब उपरीक्षक शैलेन्द्र थापाले जानकारी दिएका छन् । सो बाहिनी तथा बाहिनी मातहत कार्यालयहरुले गत आर्थिक वर्षमा उल्लेखित रुपैयाँ बराबरको लत्ताकपडा, खाद्यान्नलगायतका विभिन्न प्रकारका सामानहरु बरामद गरेका हुन् । सोही आर्थिक वर्षमा सो बाहिनी तथा मातहत कार्यालयहरुले उक्त सामान बरामद गर्नुका साथै पेस्तोल २ वटा तथा सोको १ वटा म्याग्जिन, ४ राउण्ड गोली र २ वटा भरुवा बन्दूकसहित २ जना व्यक्तिलाई नियन्त्रणमा लिई आवश्यक कारबाहीका लागि सम्बन्धित निकायमा बुझाएको छ ।

यसैगरी सोही आर्थिक वर्षमा सो बाहिनी तथा मातहत कार्यालयहरुले ठूलो परिमाणमा लागूऔषधसहित १ सय ८१ जना पुरुष र १२ जना महिला गरी १ सय ९३ जनालाई नियन्त्रणमा लिई आवश्यक कारबाहीका लागि सम्बन्धित निकायमा बुझाएको थियो । बरामद गरिएका लागूऔषधहरुमा करीव १ किलो १ सय २३ ग्राम ब्राउन सुगर, १० हजार ७ सय ७३ किलोग्राम गाँजा तथा स्पास्मो प्रोक्सिन, ट्रामाडोल, नाईट्राभेट, डाईलक्स डिसी, लुपिजेसिक, फेनारगन, नाईट्रोजन, एभिल, डाईजेपामलगायतका छन् । मानव बेचविखन कार्यमा संलग्न १ जना महिला र १८ जना पुरुषलाई नियन्त्रणम लिई सम्बन्धित निकायमा बझाउनुका साथै २३ महिला, २ पुरुष र १३ बालबालिकाको उद्धार गरी सम्बन्धित निकायमा बुझाइएको बताइएको छ ।

त्यस्तै सो बाहिनी तथा बाहिनी मातहत कार्यालयहरुले सीमावासीसँग सशस्त्र प्रहरी कार्यक्रमअन्तर्गत सीमामा बसोबास गर्ने स्थानीय बासिन्दाहरुलाई जनचेतनामूलक कार्यक्रमहरु संचालन गर्नुका साथै गत आर्थिक वर्षमा विभिन्न समूह, क्लब, तथा शैक्षिक संस्थाहरुमा लागूऔषध दुर्व्यशनीसम्बन्धी सचेतनामूलक कार्यक्रमसमेत संचालन गरेको हो । यस्तै नदिजन्य उत्खनन् नियन्त्रणका लागि परिचालित सशस्त्र प्रहरीले १ सय ४ वटा ट्रयाक्टर, ३ वटा ट्रिपर र ५ वटा जेसीबीलाई नियन्त्रणमा लिई सम्बन्धित निकायमा बुझाएको छ ।

सोही आर्थिक वर्षमा वञ्यजन्तु तथा वनपैदावार चोरी-पैठारी नियन्त्रणको क्रममा गैँडाको खाग १, हरिणको सिङ १, २ हजार ३ सय ३३ क्यूफिट विभिन्न जातको काठ बरामद गर्नुका साथै उक्त कार्यमा संलग्न २ जना व्यक्तिलाई समेत नियन्त्रणमा लिएको थियो । सो बाहिनी तथा बाहिनी मातहत कार्यालयहरुले कोशी प्रदेशका विभिन्न स्थानमा ६ हजार ८ सय ४६ वटा फलफूल तथा विभिन्न प्रजातिका बोटविरुवाहरु बृक्षारोपण समेत गरेका बताइएको छ ।