अखबार नेपाल ट्रेन्डिङ

ताप्लेजुङ । चौथो ताप्लेजुङ गोल्डकप फुटबल प्रतियोगिताको उपाधिका लागि पाँचथरको फिदिम स्पोर्टिङ क्लब र साविकको विजेता सलहेश युवा क्लबबीच प्रतिष्पर्धा हुने भएको छ ।

बुधबार भएको अन्तिम सेमिफाइनल खेलमा झापा ११ फुटबल क्लबलाई १–० गोलअन्तरले हराउँदै फिदिम फाइनलमा पुगेको हो । फिदिम स्पोर्टिङ क्लबको जितका लागि सुशन जबेगुले निर्णायक गोल गरे । खेलको ३४औं मिनेटमा सुशनले गरेको गोल नै निर्णायक बन्यो ।

प्रतिस्पर्धात्मक खेलमा झापाले गोल फर्काउने प्रयास गरेपनि असफल बन्यो । खेलमा फिदिमका खेलाडी मिराक खजुम म्यान अफ दि म्याच चुनिए ।

मंगलबार सम्पन्न पहिलो सेमिफाइनलमा भारतको जर्जियन युनाईटेड फुटबल क्लबलाई २–१ ले पराजित गर्दै सलहेश उपाधि नजिक पुगेको हो । सलहेशको जितमा निशकुमार श्रेष्ठ र फागुराम थारूले गोल गरे । सलहेशले सातदोबाटो एफसीलाई ट्राइब्रेकरमा ४–३ गोलले पराजित गर्दै अन्तिम चारमा स्थान बनाएको थियो । यता‚ जर्जियन युनाईटेडले ताप्लेजुङ–११ लाई २–१ ले पराजित गर्दै सलहेशसँगको भेट पक्का गरेको थियो ।

आयोजक लाखेजात्रा सञ्चालन समितिका अनुसार प्रतियोगिताको फाइनल खेल शुक्रबार हुनेछ । आयोजक समितिका अध्यक्ष सागर मादेनका अनुसार प्रतियोगिताको विजेताले ७ लाख २ हजार ८३ रुपियाँ र उपविजेताले ३ लाख ५२ हजार ८३ रुपियाँ नगद पुरस्कारसहित ट्रफी, पदक र प्रमाणपत्र प्राप्त गर्नेछ ।

प्रतियोगितामा सर्वोत्कृष्ट हुने खेलाडीलाई मोटरसाइकल पुरस्कार प्रदान गरिने छ भने टिकट काटेर खेल हेर्ने भाग्यशाली एक जना दर्शकले पनि उपहार स्वरुप स्कुटर प्राप्त गर्नेछ ।

लाखेजात्रा पर्वको अवसरमा आयोजना गरिएको प्रतियोगितामा आठ टोली सहभागी भएका थिए । गोल्डकप प्रतियोगिता फुङ्लिङस्थित भानुजन माध्यमिक विद्यालयको खेल मैदानमा सञ्चालन भइरहेको छ ।