अखबार नेपाल ट्रेन्डिङ

काठमाडौं:  एमडीएमएस लागू गरिए पनि हाल सञ्चालनमा रहेका मोबाइल सेट बन्द नगरिने भएको छ । नेपाल दूरसञ्चार प्राधिकरणले मोबाइल डिभाइस म्यानेजमेन्ट सिस्टम (एमडीएमएस) लागू गरेको हो ।

प्राधिकरणले मोबाइल सेट आयात गर्नुअघि अनिवार्य स्तर स्वीकृति (टाइप एप्रूभल) गर्न तथा इन्टरनेसनल मोबाइल इक्युपमेन्ट आइडेन्टिटी (आइएमइआइ) दर्ता गर्न आग्रह गरेको छ।

प्राधिकरणले पहिलो चरणअन्तर्गत व्यवसायिक आयातकर्ताले मोबाइलको आयात गर्दा आइएमइआइ रजिष्ट्रेसन एमडीएमएसमार्फत गर्ने व्यवस्था गरेको छ।

एमडीएमएसलाई क्रमश: लागू गर्दै मोबाइलको आयात एवम् प्रयोगलाई थप व्यवस्थित, भरपर्दो र सुरक्षित बनाउने दाबी प्राधिकरणको छ ।

व्यक्तिगत रुपमा आयात गरिएका मोबाइल सेटको हकमा भने प्राधिकरणको वेबसाइट https://eir.nta.gov.np/individual मा गएर दर्ता गर्न भनिएको छ।

प्राधिकरणले नेपालमा मोबाइल सेट खरिद गर्दा नियमानुसार आयात भएर प्राधिकरणमा आइएमइआइ दर्ता भएका मोबाइल सेट खरिद गर्न तथा अनिवार्य रूपमा भ्याट बिल लिन समेत प्राधिकरणले प्रयोगकर्तालाई अनुरोध गरेको छ।

नेपालका दूरसञ्चार नेटवर्कहरु नेपाल टेलिकम, एनसेल र स्मार्ट टेलिकमका सिम त्यस्ता सेटमा डिसेबल गर्ने प्राधिकरणको तयारी छ।

विदेशबाट आएको वा गिफ्ट ल्याएको एक पिस फोनहरुलाई निश्चित प्रतिशत भन्सार महसुल लिएर वा नलिएर दर्ता गर्ने भन्ने विषय समाधान हुन अझै केही समय लाग्ने देखिन्छ।

एमडीएमएसलाई आवश्यक भवन चाबहिलमा निर्माणाधीन छ। प्राधिकरणले गत माघमा मात्रै प्रिफ्याब स्ट्रक्चर भवनको ठेक्का किरातेश्वर कन्स्ट्रक्सन एण्ड ड्रिलिङ कम्पनी प्रालिलाई दिएको थियो। एमडीएमएसको समग्र प्रणाली अस्थायी रुपमा सिंहदरबारमा रहेको राष्ट्रिय सूचना प्रविधि केन्द्रमा राखिएको छ।

यो पनी पढ्नुहोस् :

महालक्ष्मी विकास बैंकले महिलामैत्री शौचालयकालागि आर्थिक सहयोग