अखबार नेपाल ट्रेन्डिङ

एजेन्सी: फिल्मी दुनियाँकै गरिमामय मानिने ९१औँ एकेडेमिक अवार्ड ओस्करमा यस वर्ष फिल्म ‘ग्रीन बुक’ले बाजी मारेको छ । अमेरिकाको लस एन्जेलसस्थित डोल्बी स्टुडियोमा गएराति सम्पन्न ओस्कार अवार्ड समारोहमा यूनिभर्सल पिक्चर्सद्वारा निर्मित उक्त ‘ग्रीन बुक’ ‘सर्वोत्कृष्ट फिल्म’ बन्न सफल भएको हो ।

फिल्म ‘ग्रीन बुक’ले सर्वोत्कृष्ट फिल्मसहित अन्य तीन वटा विधामा ओस्कार जितेको छ । यसै फिल्मबाट अफ्रिकन मूलका अमेरिकी अभिनेता महेरसाला अलिले सर्वोत्कृष्ट सहायक अभिनेताको अवार्ड जितेका छन् भने सर्वोत्कृष्ट मौलिक पटकथाको अवार्ड पनि आफ्नो पोल्टामा पर्न सफल भएको छ ।

यस्तै सर्वोत्कृष्ट अभिनेताको अवार्ड ‘बोहेमियान रुहाप्सोडी’बाट रामी मलेकले जितेका छन् । उनी यो विधामा पहिलोपटक मनोनयनमा परेका थिए । अवार्ड पाएपछि उनले आफ्नी आमालाई धन्यवाद दिए । सर्वोत्कृष्ट अभिनेताको विधामा क्रिस्चियन बेल, ब्राडले कुष्पर, विल्लेम डाफोई, भिग्गो मोर्टेसन मनोनयन सुचीमा थिए ।

यस वर्ष ‘सर्वोत्कृष्ट अभिनेत्री’को विधामा ‘द फेभरेट’बाट ओलिभिया कोलम्यानले अवार्ड पाइन् । उनी पनि पहिलोपटक ओस्करमा मनोनयनमा परेकी थिइन् । उनले चारपटक ब्रिटिस एकेडेमी अफ फिल्म अवार्ड जितिसकेकी छन् । यो विधामा यसपाली ‘द वाइफ’बाट ग्लेन क्लोजलाई प्रमुख दाबेदार ठानिएको थियो ।

यसैगरी अल्फोन्सो कुआरोन सर्वोत्कृष्ट निर्देशकको अवार्ड जिते । चलचित्र ‘रोमा’बाट उनले यो अवार्ड पाएका हुन् । यसअघि सन् २०१४ मा पनि उनले यो अवार्ड जितेका थिए । कुआरोनले यसपाली सर्वोत्कृष्ट विदेशी भाषाको चलचित्रका लागि पनि अवार्ड जितेका छन् । सर्वोत्कृष्ट सहअभिनेत्रीको अवार्ड चलचित्र ‘इफ बियल स्ट्रिट कुड टक’बाट रिगिना किङलाई दिइएको छ ।