अखबार नेपाल ट्रेन्डिङ

काठमाडौं: नेपाल राष्ट्र बैंकले प्रदेश कार्यालयलाई बैंक तथा वित्तीय संस्था अनुगमनको जिम्मा लगाउने भएको छ ।

बैंक तथा वित्तीय सुपरिक्षण विभागका अनुसार स्थानीय निकायमा वित्तीय संस्थाहरुको संख्या वृद्धि भएकाले प्रदेश कार्यालयलाई नै उक्त क्षेत्रका वित्तीय संस्था अनुगमनको जिम्मा लगाउने तयारी भएको जनाएको छ ।

राष्ट्र बैंकको प्रदेश कार्यालयहरु अनुगमनका लागि सक्षम हुँदै गएकाले र वित्तीय संस्थाहरुको शाखाहरु स्थानीय निकायमा धेरै भइरहेकाले प्रदेश शाखाले अनुमगन गराउनका लागि कार्यविधि बनिरहेको राष्ट्र बैंक स्रोत बताएको छ ।

यसभन्दा पहिला राष्ट्र बैंकले चार्टर्ड एकाउन्टेन्ट फर्महरुलाई वाणिज्य बैंकहरुका ठूला शाखालाई अडिटको जिम्मा लगाउने कार्यविधि बनाउने तयारी गरेको थियो । तर, वाणिज्य बैंकहरुले बैंकहरुको खर्च धेरै हुने भएकाले विरोधपछि उक्त योजना फिर्ता भएको थियो ।

देशैभरी एक सय ३२ वटा वित्तीय संस्थाहरुका देशैभरी १० हजार ८ सय ८२ वटा शाखा विस्तार भइसकेका छन् । जसमा  २७ वटा वाणिज्य बैंक ४ हजार ७ सय ७५ वटा शाखा सञ्जाल पुगिसकेको छ ।

त्यस्तै,  २० वटा विकास बैंक एक हजार २९ वटा शाखा सञ्चाल देशैभरी भइसकेका छन् । वित्त कम्पनी २२ वटाका २ सय ३७ शाखा, लघुवित्त वित्तीय संस्था ८५ वटाका ४ हजार ८ सय ४१ शाखा र एक पूर्वाधार विकास बैंक रहेका छन् ।