अखबार नेपाल ट्रेन्डिङ

काठमाडौं: नक्कली शैक्षिक प्रमाणपत्र पेश गरेर राजीनितक नियुक्ति खाएको विषयले काठमाडौ महानगर पालिकाका उपमेयरका उम्मेदवार सुनिता डंगोललाई  यतिखेर गम्भीर झट्का लागेको छ ।

काठमाडौं महानगरपालिकाका उपमेयरका उम्मेदवार सुनिता डंगोलविरुद्ध शैक्षिक प्रमाणपत्र ढाँटेर काठमाडौं महानगरपालिकामा नियुक्ति लिएको भन्दै अख्तियार दुरुपयोग अनुसन्धान आयोगमा उजूरी परेको छ ।

नेकपा एमालेबाट उपमेयरको टिकट पाएकी सुनिताले नक्कली शैक्षिक प्रमाणपत्र पेश गरेर विज्ञ सल्लाहाकारको नियुक्ति लिएको भन्दै  अख्तियारमा उजुरी परेको हो  ।

सुनिताले स्नातकोत्तर योग्यता प्राप्त गरेको भनी ढाँटेर ५ वर्ष काठमाडौं महानगरको शहरी विकास परियोजनाको सल्लाहकार नियुक्ति लिई तलब सुविधा लिएको आरोप छ ।

सानै उमेरमा भ्रष्टाचारीको  आरोप लागेका सुनिताले अब यस मुद्धालाई कसरी पार लगाउलान त्यो चाही हेर्न बाँकी छ ।

काठमाडौं महानगरपालिकामा रहेको शहरी विकास परियोजना जस्तो प्राविधिक विषयको ज्ञाता हुनुपर्ने र स्नातकोत्तर अध्ययन गरेको हुनुपर्ने प्रावधान रहेको छ ।

तर सुनिताले समाजशास्त्र विषयमा स्नातक गरेकी थिईन । यसरी मिल्दै नमिल्ने विषयमा स्नातक गरेकी सुनितालो कसरी त्यो पद हत्याउन सफल भईन भनेर अहिले चर्को आलोचना भईरहेको छ ।

सुनितामाथि गैरकानूनी रुपमा आर्थिक लाभ लिएको आरोप छ । उनीबिरुद्धको उजूरी १६ वैशाखमा दर्ता गरिएको छ ।

आयोगमा दर्ता भएको उजूरीमा डंगोलको नियुक्तिको सम्पूर्ण फाइल काठमाडौं महानगरबाट झिकाई भ्रष्टाचार निवारण ऐन अनुसार कसूर सजाय गराई प्राप्त गरेको रकम तथा जरिवाना समेत असुल उपर गराउन माग गरिएको छ ।

सुनितामाथि अख्तियारमा परेको उजुरीको दर्ता नम्बर सी. ०३२५३१, ०७९०१ १६, १५२६२३८५ रहेको छ  ।