अखबार नेपाल ट्रेन्डिङ

काठमाडौं: डोटी जिल्लाको जोरायल गाउँपालिका-२ स्थित बुडरमा विपद् व्यवस्थापन वेश स्थापना भएसँगै सशस्त्र प्रहरी बल, नेपालमा विपद् व्यवस्थापन वेशको संख्या १६ वटा पुगेको छ । सशस्त्र प्रहरी बल, नेपालका सह-प्रवक्ता सशस्त्र प्रहरी नायब उपरीक्षक शैलेन्द्र थापाले दिएको जानकारी अनुसार डोटी जिल्लाको जोरायल गाउँपालिका-२ स्थित बुडरमा स्थापना भएको विपद् व्यवस्थापन वेशको सशस्त्र प्रहरी बल, नेपाल नं. ७ बैद्यनाथ बाहिनी मुख्यालय कैलालीका बाहिनीपति सशस्त्र प्रहरी नायब महानिरीक्षक दिगविजय सुवेदीले उदघाटन गरेका थिए ।

डोटीको सदरमुकाम सिलगढीबाट करिव १ सय ३५ किलोमिटर पश्चिम-दक्षिणतर्फ स्थापना भएको सो बेशमा सशस्त्र प्रहरी निरीक्षकको कमाण्डमा विपद् उद्धारका आवश्यक सामग्रीसहितको टोली खटिएको छ ।  यो सँगै कोशी प्रदेशमा २, मधेश प्रदेशमा २, बाग्मती प्रदेशमा ४, गण्डकी प्रदेशमा २, लुम्बिनी प्रदेशमा १, कर्णाली प्रदेशमा २ र सुदूरपश्चिम प्रदेशमा ३ वटा विपद् व्यवस्थापन वेश स्थापना गरिएको छ । सशस्त्र प्रहरी बल, नेपालले २०८३ साल बैशाख महिनामा चतरा  सुनसरी, भारदह सप्तरी, भकुण्डेवेशी काभ्रे, आरुघाट गोरखा, बालडाँडा जुम्ला र डुडेझरी कैलालीमा विपद् व्यवस्थापन वेश स्थापना गरिसकेको छ ।

सशस्त्र प्रहरी बल नेपालले यसअघि मूलघाट धनकुटा, निजगढ बारा, आदमघाट धादिङ, खुर्कोट सिन्धुली, कुलेखानी मकवानपुर, नारच्याङ म्याग्दी, भालुवाङ दाङ, चिप्ले सुर्खेत र अमरगढी डडेलधुरामा विपद् व्यवस्थापन वेश स्थापना गरेको थियो । स्थापना भएका वेशहरुमध्ये सिन्धुलीको खुर्कोट र म्याग्दीको नारच्याङमा सशस्त्र प्रहरीको गोताखोर तैनाथ छन् भने अन्य वेशमा विपद् व्यवस्थापन तालिमप्राप्त टोली रहेका बताइएको छ ।