अखबार नेपाल ट्रेन्डिङ

काठमाडौं: प्राइम बैंकका अध्यक्ष राजेन्द्रदास श्रेष्ठले ललितपुर उद्योग वाणिज्य सङ्घका अध्यक्ष कृष्णलाल महर्जनलाई आइतबार पाटन दरबार स्क्वायरस्थित भीमसेन मन्दिर पुनःनिर्माणमा सहयोगार्थ रु. १० लाख हस्तान्तरण गर्नु भएको छ ।

ललितपुरको इतिहासमा दान दातव्य भन्ने नारालाई पाटनवासीले अघि बढाइ गतवर्षको असार १२ गते गाईको पुच्छरमा डोरी बाँधेर मन्दिरको गजुर निकाली भत्काउने काम शुरुआत गरेका थिए । ‘हाम्रो सम्पदा हामी आफैँ बनाऔँ’ भन्ने नाराका साथ मन्दिर पुनःनिर्माणमा सुन लेपन खर्चबाहेक रु चार करोड ९३ लाख लागत लाग्ने अनुमान गरिएको छ ।

मुलुकमा कोरोना माहामारी आउनुअघि वाणिज्य बैंकले रु पाँच लाख, एभरेष्ट बैंकका अध्यक्षले रु एक करोड, मन्दिर पुनःनिर्माणमा तदर्थ समितिका सदस्यले रु. ९० हजार र ललितपुर महानगरपालिकाले रु. एक करोड रकम हस्तान्तरण गरेको छ । कोरोना भाईरस महामारीका कारण मन्दिर पुनःनिर्माणमा केही ढिलाइ हुँदा हाल भूइँ तलाको काम समाप्त भएको र पहिलो तलाको काम सकिनै लागेको छ ।

विसं २०७२ वैशाख १२ को विनाशकारी भूकम्प र पटक–पटक आएको पराकम्पनका कारण मन्दिरको माथिल्लो तलाको गारो थाम्ने, थाम, दलिन र बिम भाँच्चिएर भित्ता चिराचिरा भएका थिए । मन्दिर निर्माणमा लाग्ने सम्पूर्ण प्राविधिक सहयोगको जिम्मा काठमाडौं भ्याली प्रिजर्भेशन ट्रष्टले लिएको छ ।

मन्दिर पुनःनिर्माणका लागि नेपाल सरकार राष्ट्रिय पुनःनिर्माण प्राधिकरण, पुरातत्व विभाग, काठमाडौँ भ्याली प्रिजर्भेशन ट्रष्ट, मङ्गल टोल सुधार समिति, ललितपुरभरिका जातीय समाजलगायत विभिन्न सङ्घ संस्था लागि परेका छन् ।