अखबार नेपाल ट्रेन्डिङ

काठमाडौं: विश्वभर महामारीको रुपमा फैलिएको कोरोना भाइरस संक्रमका कारण नेपालमा थप ८ जना मृत्यु भएको पुष्टि भएको छ ।

मृत्यु हुनेमा पाटन अस्पतालमा उपचाररत ललितपुरकी ६५ वर्षीया महिला, पोखरा स्वास्थ्य विज्ञान प्रतिष्ठानमा उपचाररत पोखराकी ३२ वर्षीया महिला, लुम्विनी प्रादेशिक अस्पतालमा कपिलवस्तुमा उपचाररत ५० वर्षीय पुरुष, रुपन्देहीकी ७० वर्षीया महिला, नारायणी अस्पतालको कोभिड अस्पतालमा उपचाररत बाराकी २३ वर्षीया महिला, पर्साका ७२ वर्षका पुरुष तथा वीरगञ्ज हेल्थ केयरको कोभिड अस्पतालका एक पुरुष छन् ।

वीरगञ्जस्थित नारायणी अस्पतालमा धोविनी गाउँपालिका–३ का ७२ वर्षीय पुरुष र बाराको सुवर्ण गाउँपालिका–४ हर्दिया बस्ने २३ वर्षीया महिलाको मृत्यु भएको छ ।

पोखरा स्वास्थ्य विज्ञान प्रतिष्ठानमा पनि उपचारका क्रममा एक महिलाको मृत्यु भएको छ ।

कपिलवस्तुका कोरोना संक्रमित एक पुरूषको पनि बुधबार राति मृत्यु भएको छ ।

पाटन अस्पतालमा पनि बिहीबार बिहान ललितपुरकी ६५ वर्षीया महिलाको मृत्यु भएको छ । आईसीयूमा उपचाररत उनको बिहान ६ बजेतिर मृत्यु भएको पाटन अस्पतालले जानकारी दिएको छ ।

त्यस्तै लुम्बिनी प्रादेशिक अस्पतालको कोरोना विशेष अस्पताल बुटवलमा उपचाररत रुपन्देहीको तिलोत्तमा नगरपालिका–२ जानकीनगरकी ७० वर्षीया महिलाको मृत्यु भएको अस्पतालले जनाएको छ ।

त्यस्तै किष्ट मेडिकल कलेज काठमाडौंको तारकेश्वर नगरपालिका–११ का ५५ वर्षका पुरुषको उपचारको क्रममा मृत्यु भएको छ ।

यस्तै नारायणी अस्पतालमा कोरोना आशंका गरिएका थप एक पुरुषको पनि मृत्यु भएको छ ।

रौतहटका ८० वर्षका पुरुषको मृत्यु भएको र उनको कोरोना परीक्षणका लागि स्वाब संकलन गरी प्रयोगशाला पठाइएको अस्पतालले जनाएको छ ।