अखबार नेपाल ट्रेन्डिङ

काठमाडौं: प्रा. डा. युवराज संग्रौलाले झापा क्षेत्र नं. २ बाट स्वतन्त्र उम्मेदवारी मनोनयन दर्ता गराएका छन् । प्रा.डा. संग्रौलाले उम्मेदवारी दर्ता गराउन समर्थकहरुको समूहसहित मंगलबार दिउँसो १२:३० बजे अर्जुनधारा नगरपालिकास्थित निर्वाचन आयोगको कार्यालय पुगेर स्वतन्त्र उम्मेदवारी दर्ता गराएका हुन् ।

उम्मेदवारी दर्तापछि स्थानीय पत्रकारहरूसँग कुरा गर्दै संग्रौलाले निर्वाचन जित-हारको खेलभन्दा माथि विचार र अभियानका लागि आफूले स्वतन्त्र उम्मेदवारी दिएको बताएका छन् । “झापाका सचेत जनताले विचार र अभियानलाई समर्थन गर्ने विश्वास लिएको छु”, उनले भने- आफू व्यक्तिका रूपमा विचार लिएर आएको उनको भनाइ छ । पत्रकारहरूले सोधेको प्रश्नमा डा. संग्रौलाले झापालाई डिजिटल सेन्टर बनाउने र राष्ट्रिय राजनीतिलाई सुसंस्कृत बनाउन भूमिका खेल्ने बताए ।

संग्रौलाले औद्यौगिकीकरण, भूराजनीतिमा सार्थक सन्तुलन, बाबुआमा र छोराछोरीसँगै बस्ने सुनिश्चितता, विदेशिनुपर्ने बाध्यताको अन्त्यका लागि आफू लागिपर्ने प्रतिवद्धता जनाएका छन् । वर्तमान राज्यसत्ता दलतन्त्रको चंगुलमा परेको भन्दै उनले नागरिकतन्त्रको अभियान अगाडि बढाउने बाचा समेत गरेका छन् ।