अखबार नेपाल ट्रेन्डिङ

काठमाडौं: बागमती प्रदेशका मुख्यमन्त्री बहादुर सिंह लामाले आइतबार पदबाट राजीनामा दिएका छन् । नेपाली कांग्रेस संसदीय दलको नेतामा इन्द्रबहादुर बानियाँसँग पराजित भएपछि उनीमाथि राजीनामा दिन दबाब बढेको थियो ।

लामाले आइतबार साँझ प्रदेश प्रमुख दीपक देवकोटालाई आफ्नो राजीनामा पत्र बुझाएका थिए । राजीनामापछि पत्रकारहरूसँग कुरा गर्दै लामाले आफूलाई ‘राजनीतिक षड्यन्त्र’ बाट हटाइएको आरोप लगाएका छन् । उनले आफ्नो करिब एक वर्षे कार्यकालमा गरेका सुधारका कामहरूको विवरण पनि प्रस्तुत गरेका छन् । उनका अनुसार, आफ्नो सरकारले विपद् व्यवस्थापन, भौतिक पूर्वाधार विकास, पुँजीगत खर्च र राजस्व संकलनमा उल्लेख्य सुधार गरेको थियो ।

उनले विपत्तिको समयमा द्रुत प्रतिकार्य टोली गठन गरिएको र २१ वटा रुग्ण आयोजनाहरू सम्पन्न गरिएको दाबी गरे । साथै, राजस्व संकलनमा वृद्धि, सेवा प्रवाहलाई डिजिटलाइज गर्ने प्रक्रियाको सुरुवात र सुशासनका लागि भ्रष्टाचारविरुद्धको प्रादेशिक कार्ययोजना कार्यान्वयनमा ल्याइएको पनि उनले बताए । मुख्यमन्त्री लामाको राजीनामासँगै अब बागमती प्रदेशको मुख्यमन्त्रीमा कांग्रेस संसदीय दलका नेता इन्द्रबहादुर बानियाँ नियुक्त हुने निश्चित भएको छ । कांग्रेस र नेकपा एमालेबीच एक वर्षअघि भएको सहमतिअनुसार, बानियाँले आगामी ८ महिनासम्म सरकारको नेतृत्व गर्नेछन् ।