अखबार नेपाल ट्रेन्डिङ

काठमाडौं: नागरिक लगानी कोषको ३०औँ वार्षिक साधारणसभाले गत आवको नाफाबाट १३ प्रतिशत लाभांश वितरण गर्ने प्रस्ताव पारित गरेको छ । आज भएको साधारणसभाले गत आवको आम्दानी बाँडफाँट हिसाब विवरणमा छुट्याइएको ८६ करोड ९० लाख रुपैयाँबाट ७ प्रतिशत बोनस शेयर र ६ प्रतिशत नगद लाभांश स्वीकृत गरेको हो ।

साधारणसभाले कोषका अध्यक्ष सूर्यबहादुर थापाले पेश गरेको गत आवको वार्षिक प्रतिवेदन पनि पारित गरेको छ । कोषले सञ्चालन गरेको विभिन्न बचत कार्यक्रमबाट अघिल्लो आव ०७९/८० मा २ खर्ब २ अर्ब ७ करोड रुपैयाँ सङ्कलन भएकोमा गत आवमा १२ दशमलव १९ प्रतिशतले बढेर २ खर्ब २६ अर्ब ८३ करोड रुपैयाँ पुगेको उनले बताए ।

चालू आवको असोज मसान्तसम्ममा सङ्कलित रकम २ खर्ब ४२ अर्ब १५ करोड रुपैयाँ पुगेको प्रतिवेदनमा उल्लेख छ । कोषले गत आवमा २ अर्ब ७ करोड ६४ लाख रुपैयाँ कुल आम्दानी गरेकामा सञ्चालन र अन्य खर्च कटाई करपछिको खुद मुनाफा १ अर्ब १५ करोड ८७ लाख रुपैयाँ रहेको छ । उक्त खुद मुनाफा रकमबाट २८ करोड ९६ लाख रुपैयाँ रकम जगेडा कोषमा राखी बाँकी ८६ करोड ९० लाख रुपैयाँबाट ७ प्रतिशत बोनस शेयर र ६ प्रतिशत नगद लाभांश वितरणको प्रस्ताव पारित गरेको हो । कोषका कार्यकारी निर्देशक पर्वतकुमार कार्कीले वित्तीय व्यवस्थापनलाई सरल र पारदर्शी बनाउन कोष क्रियाशील रहेको बताए ।