अखबार नेपाल ट्रेन्डिङ

रामेछापः वडाको सिमानाबारे सामाजिक सञ्जालमा आएका भ्रामक सूचनाबाट उमाकुण्ड गाउँपालिकाबासीहरुलाई भ्रममा नपर्न गाउँपालिका अध्यक्ष शेर बहादुर सुनुवारले आग्रह गरेका छन् ।

उमाकुण्ड गाउँपालिकाको वडा नम्बर ४ मा भएको वडास्तरीय अनिवार्य तथा नि:शुल्क शिक्षा घोषणा कार्यक्रममा बोल्दै पालिका अध्यक्ष सुनुवारले संविधान प्राप्त भईसकेपछि नेपालको पुर्नसंरचनामा जिल्ला र पालिका पालिकाबीचको सिमनालाई विशेष प्राथामिकता राखेर सिमाङ्कन गरेको र पालिकाको वडामा पनि सिमाङ्कनमा प्राविधिक त्रुटी भएको र यसको समाधान चाँडै हुने बताए ।

कार्यक्रमका प्रमुख अतिथि समेत रहेका पालिका अध्यक्ष शेर बहादुर सुनुवारले उमाकुण्डको शिक्षालाई यहि आर्थिक वर्षमा अझ धेरै बजेट छुट्याएर गुणस्तरीय बनाउने प्रतिवद्धता व्यक्त गरे । विद्यालय सुधारका लागि सहयोग गर्नुहुने सम्पुर्ण महानुभावलाई धन्यवाद दिदै आगामी दिनमा पनि यस्तै साथ सहयोगको समेत अपेक्षा रहनेमा आशावादी रहेको बताए ।

कार्यक्रमका विशिष्ट अतिथि उमाकुण्ड गाउँपालिका उपाध्यक्ष सावित्री सुनुवारले वडास्तरीय अनिवार्य तथा नि:शुल्क शिक्षा घोषणा कार्यक्रम सबैको लागि हो भन्ने बुझ्न आग्रह गरे । शिक्षाको निम्ति हरपल पालिकाले खेलकुदको कार्यक्रम गरेको र आगामी दिनमा पनि निरन्तर रहने प्रतिबद्धता व्यक्त गरे । आगामी दिनमा स्टेसनरी सामान ल्याउन नसक्ने बालबालिकालाई पालिकाले नै बजेट छुट्याएर यसको समाधान गर्ने बताए ।

त्यस्तै शिक्षा शाखा प्रमुख ङावा शेर्पाले गुणस्तरीय शिक्षा बनाउन घर परिवार, विद्यालय र स्थानीय सरोकारवाला सबैको जिम्मेवारी भएको बताए । विद्यार्थीहरुको शैक्षिक गतिविधिलाई माथि ल्याउन यो कार्यक्रम आएको जानकारी गराए ।

अनिवार्य तथा नि:शुल्क शिक्षा घोषणा कार्यक्रम उमाकुण्ड-४ का वडा अध्यक्ष मान बहादुर सुनुवारको अध्यक्षतामा सम्पन्न भएको कार्यक्रममा बोल्दै वडा अध्यक्ष सुनुवारले स्कुलमा  बालबालिका कति आउछन् आउदैनन् त्यो कुरा अभिभावकमा ध्यान नगएको बताए । बालबालिकाको लागि वडा नम्बर ४ ले हरेक वर्ष यस्तै कार्यक्रम गरेपनि यो वर्षको कार्यक्रमले अझ सुधार ल्याउने बताए । अबको दिनमा शिक्षाको निम्ति राज्यले दिएको नीति र पद्धतिमा टिकेर काम गर्ने प्रतिवद्ध व्यक्त गरे ।

कार्यक्रममा ३ जना बालबालिका विद्यालय भर्ना भएका थिए । उनीहरुलाई स्टेशनरी सामान र झोला दिएर स्वागत गरिएको थियो । कार्यक्रममा विभिन्न विद्यालयका  प्रधानाध्यापक, शिक्षक, जनप्रतिनिधि, विभिन्न राजनीति दलकाप्रतिनिधि, सरोकारवाला र अभिभावकहरुको उपस्थिति थियो ।