अखबार नेपाल ट्रेन्डिङ

काठमाडौं: लोकतन्त्रवादी पत्रकारहरुको छाता संगठन नेपाल प्रेस यूनियनको ९औं महाधिवेशनको तयारी अन्तिम चरणमा पुगेको छ ।

सत्तारुढ नेपाली कांग्रेसको शुभेच्छुक संस्थाको रुपमा रहेको युनियनको आगामी साउन ६ र ७ गते बागमती प्रदेशको राजधानी हेटौंडामा हुने महाधिवेशनका लागि कुसुम बिक सेञ्चुरीले महिला तर्फको उपमहासचिव पदमा उम्मेदवारी घोषणा गरेकी छिन् ।

रेडियो पत्रकारिताबाट आफ्नो करियर सुरु गरेकी कुसुमले १७ बर्ष भन्दा बढी समय पत्रकारिता क्षेत्रमा बिताइसकेकी छिन् । हाल उनी अनलाईन डिजिटल पत्रिका नेपालबहस डटकममा समाचार प्रमुखको रुपमा कार्यरत छिन् ।

उनले यसअघि फूलबारी एफएम, रासस, रेडियो अन्नपूर्ण, देशान्तर र नाइस टीभीमा समाचार बाचिकाको रुपमा कुशलतापूर्वक जिम्मेवारी सम्हालिसकेकी छिन् ।

उपमहासचिव पदमा उम्मेदवारी घोषणासँगै उनले भने ‘लोकतान्त्रिक मूल्य मान्यताबाट विचलित हुन नदिन सरोकारवाला निकायहरुलाई सही मार्गमा डोहोर्याउन खबरदारी गर्नसक्ने हैसियतको संस्था प्रेस युनियनलाई अझ सशक्त र सुदृढ बनाउन मैले उपमहासचिव पदमा उम्मेदवारी दिने निर्णय गरेकी हुँ ।’ उनले भनिन्- ‘लोकतन्त्रमा मात्र स्वतन्त्र र स्वच्छ पत्रकारिता सम्भव रहन्छ, नेपाल प्रेस युनियनलाई लोकतन्त्र, प्रेस स्वतन्त्रता र श्रमजीवी पत्रकारको सम्मान एवं महिला पत्रकारहरुको सुरक्षाका पक्षमा बलियो ढंगले लाग्ने सक्षम संस्था बनाउन युनियनकर्मी सबै साथीहरु एकजुट हुनुपर्छ ।’

‘गतिशील नेतृत्व, चलायमान संगठन, बिधि र पद्धतिसम्मत निर्णय, संस्थागत सुदृढीकरण, आवधिक अधिवेशन,तथा पत्रकारहरुको दक्षता अभिबृद्धि, पेशागत सूरक्षा, पत्रकार महिलाहरुको संरक्षण एवं ट्रेड यूनियन अधिकारका लागि’ आफ्नो उम्मेदवारी रहेको कुसुम सेञ्चुरीले बताईन् ।

नेपाल दलित संघ बर्दियाकी सचिव समेत रहेकी उनी क्रियाशील महिला पत्रकार बर्दियाको संस्थापक अध्यक्ष पनि हुन् । अन्य दर्जनौं सामाजिक संघसंस्थामा पनि आबद्ध रहेका उनले यसपटक उपमहासचिव जितेरै छोडने अठोटका साथ अत्याधिक मतले विजयी गराउनु हुन सबैमा उनले विनमतापूर्वक अनुरोध गरेकी छिन् ।