अखबार नेपाल ट्रेन्डिङ

काठमाडौं: भेरी अस्पतालको स्टोर कोठामा ४ जना मृत अवस्थामा भेटिएका छन् ।

अस्पतालको स्टोर कोठामा सुतेका सात जनामध्ये चार जनाको मृत्यु भएको जिल्ला प्रहरी कार्यालय बाँकेले जनाएको छ ।

घटनाको प्रारम्भिक अवस्था हेर्दा कोठाका कोइला बाली सबै झ्याल ढोका थुनेका कारण निसासिएर मृत्यु भएको हुन सक्ने प्रहरीको अनुमान छ ।

मृत्यु हुनेमा स्टोरमा कार्यरत कार्यालय सहयोगी खाँडाचक्र नगरपालिका ६ कालीकोटका २३ वर्षीय धनप्रसाद भट्टराई, उनको ३ महिनाको छोरा इप्सन भट्टराई, सासु अन्दाजी ५५ बर्षीया कोपिला र धनप्रसादकी बहिनी २२ बर्षीया कोली भट्टराईको रहेको अधिकारीले बताए ।

कोठामा सुतेका भट्टराईकी श्रीमती, ३ बर्षीय छोरा र बहिनीको उपचार भइरहेको छ । घाइतेहरुको भेरी अस्पतालमै उपचार भइरहेको छ । घटनाबारे थप अनुसन्धान जारी उनको भनाइ छ ।