अखबार नेपाल ट्रेन्डिङ

काठमाडौं: काठमाडौं उपत्यकासहित देशभरका अधिकांश स्थानमा बिहानैदेखि वर्षा भइरहेको छ भने उच्च पहाडी तथा हिमाली भू-भागमा हिमपात भएको छ ।

मौसम पूर्वानुमान महाशाखाका अनुसार पश्चिमी न्यून चापीय प्रणाली देशैभर सक्रिय हुँदा वर्षा र हिमपात भएको हो । वर्षा र हिमपातसँगै चिसो झनै बढेको छ ।

यतिबेला काठमाडौं उपत्यकामा पनि वर्षा भइरहेको छ । वर्षासँगै प्रमुख पर्यटकीय केन्द्र चन्द्रागिरीमा हिमपात सुरु भएको छ ।

चन्द्रागिरी हिल्स लिमिटेडका जेनेरल म्यानेजर अभिषेक बिक्रम शाहले चन्द्रागिरीमा हिमपात सुरु भएको जानकारी दिएका हुन् ।

आज दिउँसो धेरै स्थानमा हल्कादेखि मध्यम वर्षाको सम्भावना छ । उच्च पहाडी तथा हिमाली भू-भागका धेरै स्थानमा हल्कादेखि मध्यम हिमपातको आँकलन गरिएको छ ।

बिहीबार भने मौसममा केही सुधार आउने अपेक्षा गरिएको छ । यद्यपि थोरै स्थानमा हल्का वर्षा र उच्च पहाडी तथा हिमाली भूभागका केही स्थानमा हल्कादेखि मध्यम हिमपातको सम्भावना छ ।