अखबार नेपाल ट्रेन्डिङ

काठमाडौ: नेपाली महिला राष्ट्रिय टोलि र भारतबीचको मैत्रीपूर्ण खेलमा नेपाल विजयी भएको छ । सिक्किमको पाल्जोर रङ्गशालामा बुधबार भएको खेलमा नेपालले भारतलाई टाइब्रेकरमा ३-० गोल अन्तरले पराजित गरेको हो ।

टाइब्रेकरमा नेपालका लागि गोलरक्षक अन्जना रानामगरले भारतको दुई प्रहार रोकेकी थिइन् । भारतको अर्को प्रहार पोस्टमाथि बाहिरिएको थियो । यसअघि निर्धारित ९० मिनेटको खेल १–१ गोलको बराबरीमा सकिएको थियो । निकै प्रतिस्पर्धात्मक खेलमा दुवै टोलीले पहिलो हाफमा गोल गरेका थिए । त्यसपछि खेल सोझै टाइब्रेकरमा पुगेर सकिएको थियो ।

भारतले ३०औँ मिनेटमा अग्रता लिएको थियो । नेपाली रक्षकको कमजोरीमा सौम्या गुगुलोथले गोल गरेकी थिइन् । नेपालले पनि पहिलो हाफको इन्जुरी समयमा बराबरी गोल फर्काएको थियो । कप्तान अनिता बस्नेतको कर्नरमा रश्मी कुमारी घिसिङले हेड गोल गरेकी थिइन् । अनितालाई यस खेलमा नेपाली टोलीको कप्तानी गर्ने अवर मिलेको हो ।

यसअघि भारतमै खेलिएको नेपाल, भारत र इरानसम्मिलित त्रिदेशीय खेलमा नेपालले भारतलाई २-१ गोल अन्तरले पराजित गरेको थियो । नेपाल इरानसँग ३-० गोल अन्तरले पराजित भएको थियो ।