अखबार नेपाल ट्रेन्डिङ

काठमाडौं: नेपालले आज यमनसँग फिफा विश्वकप २०२६ छनोट अन्तर्गत दोस्रो चरणको अन्तिम खेल खेल्दैछ । खेल साउदी अरेबियाको दमामको प्रिन्स मोहमद बिन अफद मैदानमा हुनेछ । खेल नेपाली समय अनुसार राति ११:४५ बजे सुरु हुनेछ ।

यमनले आफ्नो होम गेम साउदी अरेबियामा सारेको हो । विश्वकप छनोटको दोस्रो चरणमा लगातार पराजित नेपाल आज यमनविरुद्धको खेलमा पहिलो जितको खोजीमा मैदानमा उत्रनेछ । नेपाली टोलीका कप्तान किरणकुमार लिम्बूको यो खेलसँगै सय अन्तर्राष्ट्रिय खेल पूरा हुँदैछ ।

समूह ‘एच’ मा रहेको नेपालले यसअघि खेलेको पाँचै खेलमा पराजय भोगेको थियो । यही जेठ २५ गते भएको संयुक्त अरब इमिरेट्स (युएई) विरुद्धको दोस्रो खेलमा नेपाल ४-० गोलअन्तरले पराजित भएको थियो । नेपालमा नै हुनुपर्ने उक्त खेल दशरथ रंगशालामा समस्या भएपछि नेपालले साउदी अरेबियामा सारेको थियो ।

त्यसअघि नेपाल युएईसँग पहिलो खेलमा ४-० र यमनसँग २-० ले पराजित भएको थियो । त्यस्तै नेपालले बहराइसँगको पहिलो खेल ५-० र दोस्रो खेल ३-० ले पराजित भएको थियो ।