अखबार नेपाल ट्रेन्डिङ

काठमाडौं: आइसिसी टि-२० विश्वकप एसिया फाइनल क्षेत्र छनोट अन्तर्गत घरेलु टोली नेपालले आज मलेसियासँग खेल्दैछ । खेल दिउँसो १:१५ मा टियु क्रिकेट मैदानमा सुरु हुनेछ ।

नेपालले पहिलो खेलमा सिंगापुरलाई ८ विकेटले हराएको थियो । मलेसिया पहिलो खेलमा ओमानसँग ३२ रनले पराजित भएको थियो । घरेलु टोली नेपाल लगातार दोस्रो जितको सोचमा मैदान उत्रनेछ । आज पहिलो खेलमा ओमानले सिंगापुरलाई हराए नेपाल आजको विजयीले सेमिफइनलमा समेत पुग्नेछ ।

प्रतियोगिताको पहिलो खेलमा कुशल भुर्तेलले ७४ रन बनाउँदै राम्रो सुरुवात गरेका छन् । अर्का ओपनर आसिफ शेखबाट नेपाल राम्रो इनिङ र स्ट्राइकरेट दुबै चाहन्छ । कुशल मल्ल र सन्दीप जोराको प्रदर्शन नेपालको लागि निकै महत्वपूर्ण हुनेछ ।

कप्तान रोहित पौडेलको प्रदर्शनले नेपालको योगफल निर्धारण हुनसक्छ । सोमपाल कामी, करण केसी र गुलशन झा राम्रो ब्याटिङ गर्ने गर्दछन् । नेपालका दीपेन्द्रसिंह ऐरी चोटका कारण टोलीमा छैनन् । प्रमुख अलराउन्डर नहुँदा नेपाल समस्यामा पर्न सक्छ । दीपेन्द्रको स्थानमा विवेक यादवलाई निरन्तरता दिने देखिन्छ । विवेक घरेलु क्रिकेटमा राम्रो अलराउन्डर हुन् । तर सिनियर टोलीमा राम्रोसँग खेल्ने मौका पाएका छैनन् । सेमिफाइनल अघि विवेकलाई ब्याटिङमा मौका दिन आवश्यक देखिन्छ ।

उता मलेसियाका विरनदीप सिंह प्रमुख हतियार हुन् । एसोसिएट क्रिकेटमा दुई हजार टि-२० आई रन पूरा गर्ने मात्रै दोस्रो खेलाडी विरनदीप चलेको खण्डमा नेपाललाई स्तब्ध पार्न सक्छन् । उनले ओमानविरुद्ध पहिलो खेलमा अर्धशतक प्रहार गरेका थिए । ओपनर सैद अजिज र जुबैदी जुलकिफी यी दुई ब्याटरले पनि मलेसियाबाट लगातार राम्रो प्रदर्शन गर्दै आएका छन् । कप्तान अहमद फैज अनुभवी हुँदा राम्रो गर्नसक्छन् । बलिङ आक्रामणमा पवनदीप र विरनदीप दाजुभाइको स्पिन जोडीमा नेपाल केहि सचेत हुनुपर्छ ।

आजको पहिलो खेलमा टियु क्रिकेट मैदानमा बिहान ९ बजे सिंगापुर र ओमान खेल्नेछन् भने उता मुलपानी क्रिकेट मैदानमा पहिलो खेलमा हङकङले बहराइनसँग खेल्नेछ । दोस्रो खेलमा कुवेत र युएई भिड्नेछन् ।