अखबार नेपाल ट्रेन्डिङ

काठमाडौं: चारदिने नेपाल भ्रमणमा रहेका संयुक्त राष्ट्रसंघका महासचिव एन्टोनियो गुटेरेसले आज संसदमा सम्बोधन गर्ने भएका छन् । आज संघीय संसद्को प्रतिनिधिसभा र राष्ट्रियसभाको संयुक्त बैठक बस्दै छ ।

बैठकलाई संयुक्त राष्ट्रसंघका महासचिव गुटेरेसले सम्बोधन गर्ने संसद सचिवालयले जनाएको छ । गुटेरेसले आज अपराह्न ४ बजे संघीय संसद्को दुवै सदनको संयुक्त बैठकलाई सम्बोधन गर्ने कार्यसूची छ । बैठक प्रारम्भ भएसँगै गुटेरेसले सम्बोधन गर्ने कार्यसूची छ । उनको सम्बोधनलगत्तै सोही बैठकले महासचिव गुटेरेसलाई धन्यवाद ज्ञापन प्रस्ताव पारित गर्नेछ ।

महासचिव गुटेरेसको सम्बोधनको संघीय संसद् सचिवालयले नियमित बैठकहरूको जस्तै अभिलेख राख्नेछ । बैठकको तयारी अन्तिम चरणमा पुगिसकेको संसद् सचिवालयले जनाएको छ । बिहान १० बजेसम्म साजसज्जा लगायत सबै तयारी सकिने सचिवालयले बताएको छ ।