अखबार नेपाल ट्रेन्डिङ

काठमाडौं: नेपाली राष्ट्रिय फुटबल टिमका मुख्य प्रशिक्षक अब्दुल्लाह अलमुताइरी एन्फासँग तीन वर्षको सम्झौता गरेका छन् ।

बुधबार प्रशिक्षक अलमुताइरीले सामाजिक सञ्जालमार्फत अखिल नेपाल फुटबल संघ (एन्फा), एन्फा अध्यक्ष कर्मा छिरिङ शेर्पा र कतार फुटबल संघलाई मेन्सन गर्दै सम्झौता नवीकरण गरेको जानकारी दिएका हुन् ।

उनले नेपाल फर्किन सहयोग गरेकोमा कतार फुटबल संघलाई धन्यवाद दिएका छन् । यस्तै, उनले नेपाली फुटबलका लागि आगामी २ वर्षको योजना बनाएको पनि जानकारी दिएका छन् ।

उनले आफू र आफ्नो खेलाडीलाई नेपाली फ्यानहरूको साथ र माया चाहिएको पनि बताएका छन् । यता, एन्फाका अध्यक्ष कर्माछिरिङ शेर्पाले पनि प्रशिक्षक अल्मुताइरीसँग नयाँ सम्झौता भएको जानकारी दिए ।

यसअघि अल्मुताइरीसँग एक वर्षको सम्झौता गरेपनि एन्फाले खुलाएको थिएन । गत महिना सम्पन्न साफ च्याम्पियनसिप अन्तर्गत बंगलादेशविरुद्धको खेल सकिएपछि अल्मुताइरीले आफूले एक महिना अगाडि नै राजीनामा दिएको खुलासा गरेका थिए ।

सन् २०२१ को मार्चमा नेपाल आएका अल्मुताइरीले नेपाललाई गत महिना सम्पन्न साफ च्याम्पियनसिपको उपविजेता बनाएका थिए । नेपाल इतिहासमा पहिलोपटक साफको फाइनलमा पुगेको थियो ।

उनको नेतृत्वमा नेपालले जेठमा इराकविरुद्ध मैत्रीपूर्ण खेल खेलेको थियो । त्यसपछि, नेपाली फुटबल टोलीले अष्ट्रेलिया, जोर्डन र चाइनिज ताइपेविरुद्ध विश्वकप तथा एसियन कप छनोटको समूह चरण खेल उनकै नेतृत्वमा खेलेको थियो ।

यस्तै, भारतविरुद्ध भदौमा दुई मैत्रीपूर्ण खेल र गत साता साफ च्याम्पियनसिपका ५ खेल खेलेको थियो । इराकविरुद्धको मैत्रीपूर्ण खेल ६–२ ले गुमाएको नेपालले छनोटमा चाइनिज ताइपेलाई २–० ले हराएको थियो ।

अष्ट्रेलिया र जोर्डनविरुद्धको खेल नेपाल समान ३–० ले पराजित भएको थियो ।

भारतविरुद्ध दशरथ रंगशालामा भएको पहिलो मैत्रीपूर्ण खेलमा नेपालले १–१ को बराबरी खेलेको थियो । यस्तै, दोस्रो खेलमा २–१ ले पराजित भएको थियो ।

साफमा सुरुवाती दुई खेलमा माल्दिभ्सलाई १–०, श्रीलंकालाई ३–२ ले पराजित गरेको नेपालले अर्को खेल भारतसँग १–० ले गुमाएको थियो ।

राउन्ड रोविनको अन्तिम खेलमा बंगलादेशसँग १–१ को बराबरी खेल्दै नेपाल फाइनल पुगेको थियो ।

तर, नेपाल फाइनलमा भारतसँग ३–० ले पराजित भएको थियो । नेपालसँग समग्रमा अल्मुताइरीको नतिजा ११ खेलमा ३ जित, २ बराबर र ६ हार रहेका छन् ।