अखबार नेपाल ट्रेन्डिङ

काठमाडौं:  कर्णालीमा डाक्टरी पढाइको वैधानिक ढोका खुलेको छ । चिकित्सा शिक्षा आयोगले स्वीकृति दिने निर्णय गरेसँगै जुम्लामा चिकित्सक उत्पादन गर्ने बाटो खुलेको हो ।

यही जेठ २९ गते सम्पन्न आयोगको बैठकले प्रतिष्ठानमा स्नातक तहको एमबीबीएस कार्यक्रम शुरुवात गर्न स्वीकृति दिने निर्णय गरेसँगै अब कर्णालीमा डाक्टरी पढाइको वैधानिक ढोका खुलेको हो ।

आयोगले कर्णाली स्वास्थ्य विज्ञान प्रतिष्ठान जुम्लामा चिकित्साशास्त्रको स्नातक तह (एमबीबीएस) कार्यक्रम सञ्चालन गर्न स्वीकृति प्राप्त गरेसँगै कर्णालीबासीको सपनाले सार्थकता पाएको हो ।

कोभिड–१९ का कारण निर्णयसहितका प्रक्रियामा ढिलो भए पनि प्रतिष्ठानमा चालु आर्थिक वर्षको शैक्षिक सत्रभित्र नै एमबीबीएस कार्यक्रम सञ्चालन हुने छ । प्रतिष्ठानलाई एमबीबीएस सञ्चालन गर्न हाललाई करीब २५ सिट दिने गरी निर्णय भएको श्रोतले जनाएको छ ।

कर्णालीलाई मेडिकल हब बनाउने ढोका खुलेको छ । प्रतिष्ठानमा एमबीबीएस र एमडी कार्यक्रम सञ्चालनले गुणस्तरीय स्वास्थ्य सेवा र चिकित्सा शिक्षा सुनिश्चित गर्न थप कोशेढुङ्गाको काम गर्नेछ ।

कोरोना परीक्षण तथा उपचारमा प्रतिष्ठानद्वारा सञ्चालित जुम्ला अस्पतालले देशमा नै उत्कृष्ठ सेवा पुर्‍याउँदै आएको छ । प्रतिष्ठानले कर्णालीका डाक्टर अभाव भएका अस्पताल तथा पालिकामा डाक्टरको व्यवस्था समेत गर्दै आएको छ ।

इच्छाशक्तिका अगाडि असम्भव ठानिएका हरेक कुरा असत्य साबित हुँदा रहेछन् भन्ने चरितार्थ दुर्गम कर्णाली प्रदेशको जुम्लामा भइरहेको स्नातकोत्तर तहको चिकित्सा शिक्षाको पठनपाठन र चालु आवभित्रै शुरु हुने एमबीबीएस कार्यक्रमले पुष्टि गरेको छ । विगतमा सिटामोलको चक्की नपाउने कर्णाली आज विशेषज्ञ डाक्टरसहितको जनशक्ति उत्पादन गर्ने थलोमा रुपान्तरण भएको छ ।

यो पनि पढ्नुहोस् :

एभरेष्ट बैंक लिमिटेडले नागरिक केयर सेन्टरलाई आर्थिक सहयोग