अखबार नेपाल ट्रेन्डिङ

एजेन्सी: सुडानमा लोकतन्त्रको माग गर्दै हजारौं नागरिक सडकमा उत्रिएका छन् । लोकतन्त्रवादीमाथि सैन्य शासकहरुले ज्यान लिने गरी आक्रमण गरेको विरोधमा हजारौं नागरिक प्रदर्शनमा उत्रिएका हुन् ।

राष्ट्रपति भवन नजिकै प्रदर्शनकारीहरुको रयाली पुगेपछि सात जना प्रदर्शनकारीको मृत्यु भएको छ । सुडानको सरकारी समाचार एजेन्सी ‘एसयूएनए’ ले स्वास्थ्य मन्त्रालयका एक अधिकारीलाई उद्धृत गर्दै प्रदर्शनका क्रममा सात जनाको मृत्यु भएको पुष्टि गरेको छ । यद्यपि समाचारमा मृत्युको कारण र उनीहरुको परिचय भने खुलाइएको छैन ।

‘एसयूएनए’ अनुसार एक सय ८१ जना घाइते भएका छन् । जसमध्ये २७ जनालाई गोली लागेको छ । यसका साथै प्रदर्शनका क्रममा भएको झडमा परी सेनाका १० जवान पनि घाइते भएका छन् । यसअघि प्रदर्शनकारीसँग सम्बन्धित डाक्टरहरुको समितिले पाँच प्रदर्शनकारीको मृत्यु भएको बताएको थियो । समितिका अनुसार सैन्य परिषद्का मिलिशियाद्वारा चलाइएको गोली लागेर कयौं प्रदर्शनकारी घाइते भएका छन् ।