अखबार नेपाल ट्रेन्डिङ

एजेन्सी: स्ट्रेइट अफ होर्मुजमाथिको अन्तर्राष्ट्रिय आकाशमा रहेको अमेरिकी सेनाको एउटा ड्रोनलाई इरानले क्षेप्यास्त्र प्रहार गरेर खसालेको अमेरिकी अधिकारीहरूले जनाएका छन् ।

इरानको इस्लामिक रिभोलुसन गार्डस् कोर (आइआरजिसी)का अनुसार ड्रोन इरानी आकाशभित्र बिहीवार विहान प्रवेश गरेकाले खसालिएको बताइएको छ । आइआरजिसीका कमान्डरले उक्त घटनाले अमेरिकालाई स्पष्ट सन्देश दिएको बताएको इरानका सरकारी संचारमाध्यमले जनाएका छन् । अमेरिका र इरानबीच तनाव चुलिरहँदा यो घटना भएको अन्तर्राष्ट्रिय संचारमाध्यमले जनाएका छन् ।

इरानको सर्वोच्च राष्ट्रिय सुरक्षा परिषद्का सचिवले बुधबारनै तेहरानले आफ्नो आकाशमा बिना अनुमति उडान नदिने बताएका थिए । सोमवार अमेरिकी रक्षा मन्त्रालयले इरानी सुरक्षाबलले उत्तेजक व्यवहार देखाएको भन्दै थप एक हजार अमेरिकी सेना त्यसतर्फ खटाउने बताएको थियो । अमेरिकाले इरानलाई गल्फ अफ ओमानमा दुईवटा पेट्रोलियम तेल ट्याङ्करमाथि हमला गरेको आरोप लगाएको छ । इरानले भने उक्त आरोपलाई अस्वीकार गर्दै आएको छ ।

यता अमेरीकाको ड्रोन खसालेर इरानले निकै ठूलो गल्ती गरेको अमेरिकी राष्ट्रपति डोनल्ड ट्रम्पले बताएका छन् ।