अखबार नेपाल ट्रेन्डिङ

एजेन्सी: अफ्रिकी मुलुक बुर्किना फासोमा एक चर्चमा आक्रमण हुँदा कम्तीमा ६ जनाको मारिएका छन् भने एक दर्जन बढी घाइते भएका छन् ।

राजधानी वागाडुगुभन्दा उत्तरमा रहेको डाब्लो शहरमा रहेको चर्चमा मानिसहरुले प्रार्थाना गरिरहेका बेला २० देखि ३० जनाको समूहमा आएका बन्दुकधारीले जथाभावी गोली चलाएको अधिकारीले जनाएका छन् । बन्दुकधारीको आक्रमणमा एक जना पादरी समेत मारिएको जनाइएको छ । चर्चमा आक्रमण भएपछि हाल डाब्लो शहरमा आतंकको त्रासले मानिसहरु बाहिर समेत निस्कन नसकेको एएफपीले जनाएको छ । यता नजिकै शिविर बनाएर बसेको सेनाले आक्रमणका बेला कुनै कारवाही नगरेको भन्दै स्थानीय आक्रोशित रहेको बताइएको छ ।

बुर्किना फासोमा पछिल्ला केही महिनायता इसाई धर्मावलम्बीलाई लक्षित गरी बेला बेला आक्रमण हुँदै आएका छन् । पछिल्लो आक्रमणमा कुन समूहको संलग्नता छ भन्ने स्पष्ट नभए पनि त्यस क्षेत्रमा सक्रिय इस्लामिक अतिवादीले यस्ता आक्रमणहरु गराउँदै आएका छन् ।