अखबार नेपाल ट्रेन्डिङ

एजेन्सी: इजिप्टको सेनाले मुलुकको सिनाई प्रायद्विपमा गरेको सुरक्षा कारवाहीमा ४६ जना इस्लामिक अतिवादी मारिएका छन् ।

पछिल्लो समय इजिप्टको सेनाले सिनाई प्रायद्विपको उत्तर तथा मध्य क्षेत्रमा गरेको सैनिक कारवाहीमा ४६ जना ‘अति नै खतरनाक’ इस्लामिक अतिवादी मारिएको इजिप्टको सेनाले जनाएको हो । यद्यपि सेनाले सैनिक कारवाही गरेको मिति तथा स्थानबारे भने केही खुलाएको छैन ।

त्यसबाहेक सैनिक कारवाहीका क्रममा अरु १ सय भन्दा धेरै संदिग्ध लडाकुलाई पक्राउ गरिएको, २ सयभन्दा धेरै विष्फोटक सामग्री बरामद गरिएको तथा २० भन्दा धेरै कार तथा अन्य सवारी साधन नियन्त्रणमा लिइएको जनाइएको छ । इजिप्टको सेनाले सन् २०१८ को फेब्रुअरी महिनायता सिनाई प्रायद्विप तथा मुलुकका अन्य क्षेत्रमा सक्रिय रहेको भनिएका इस्लामिक अतिवादीविरुद्ध सैनिक कारवाही गर्दै आएको छ ।

अन्तर्राष्ट्रिय मानवअधिकारवादी संस्थाहरुले भने सेनाको सैनिक कारवाहीमा मानवअधिकार हननका विभिन्न घटना हुने गरेको र त्यसमा सेनाको हात रहने गरेको भन्दै आलोचना गर्दै आएका छन् ।