अखबार नेपाल ट्रेन्डिङ

काठमाडौं: त्रिभुवन विमानस्थलमा जाँचका क्रममा गायिका आस्था राउतले आफूमाथि दुर्व्यवहार गरेको भन्दै प्रहरी जवान रमिता श्रेष्ठले जाहेरी दिएकी छिन् । त्रिभुवन अन्तर्राष्ट्रिय विमानस्थल सुरक्षा कार्यालयमा उनले जाहेरी दिएकी हुन् ।

विमानस्थल प्रहरी कार्यालयले उक्त उजुरी महानगरीय प्रहरी कार्यालय रानिपोखरी पठाएको छ । महानगरीय प्रहरी कार्यालयले उजुरी आएको पुष्टि गर्दै आवश्यक अनुसन्धान गरेर कारबाही गर्ने बताएको छ । गत बुधबार गायिका राउतले आफूमाथि दुर्व्यवहार भएको भन्दै सामाजिक सञ्जाल फेसबुकमा लाइभ गरेकी थिइन् । त्यसको केहीबेरमा नै उनले भिडियो हटाएकी थिइन् ।

शुक्रबार विमानस्थलमा जाँच गर्दाको सिसिटिभी भिडियो बाहिरिएपछि गायिका राउतको अस्वभाविक व्यवहार भिडियोमा देखिएको थियो । त्यससँगै राउतले फेसबुक मार्फत नै लाइभमा आफ्नो बचाउ गरेकी थिइन् ।