अखबार नेपाल ट्रेन्डिङ

काठमाडौं: गायक कृष्ण पौडेलले नयाँ गीत लुकी लुकी मायाले सार्वजनिक गरेका छन् ।

गायक स्वयंकै शब्द र संगीत रहेको उक्त गीतमा गायिका आरती अधिकारीको साथमा नयाँ लोक गीत सार्वजनिक गरेका हुन् ।

पछिल्लो समय समाजमा भएको माया प्रेमको भावनालाई समेटेर लुकी लुकी मायाले बोलको गीत तयार गरिएको गायक पौडेलले बताए ।

यसअघि कसैको पीडा र वास्तविकता समेटेर गीत तयार गर्ने पौडेलले यस पटक भने माया प्रेमलाई समेटेर गीत तयार गरेको बताउँछन् ।

लुकी लुकी मायाले बोलको गीत जिन्दगीको वास्तविकता आभास गराउने खालको छ । उनले भने “माया भन्ने भावनालाई कसैले रोक्न नसक्ने र छेकेर नछेकिने भावना हो भन्ने कुरा गीतमा रहेको छ ।”

पोखराको पृथ्वीनारायण क्याम्पस पढ्दादेखि नै गीतसंगीतमा सक्रिय गायक पौडेल विदेशमा बसेर पनि नेपाली गीतसंगीतमा अभिरूचि राख्ने गर्दछन् । “नेपाली संगीत सधै सुख दु:खको साथी हो, त्यसैले अनेक आरोह अवरोह आए पनि मैले सहजरूपमा ग्रहण गरेको छु” गायक पौडेलले भने” त्यसैले म प्रवासमा भएपनि नेपाली गीतसंगीतबाट टाढा हुन सकिरहेको छैन ।”

विनोद बजुरालीको संगीत संयोजन रहेको गीतको म्युजिक भिडियोको निर्देशन होम गुरूङले गरेका छन् । सविन गुरूङको कोरियोग्राफी रहेको म्युजिक भिडियोमा लोमश शर्मा र अमृता सापकोटाले अभिनय गरेका छन् ।

म्युजिक भिडियोको छायाङ्कन गणेश सापकोटाको रहेको छ भने दृश्य सम्पादन सुवास अमगाईले गरेका छन् । फलानो क्रियसन, पोखराको पोष्ट प्रोडक्सनमा उक्त म्युजिक भिडियो तयार भएको हो ।

कतारलाई कर्मभुमि बनाउदै आएका गायक पौडेलले लोकसंगीतलाई निरन्तरता दिँदै तेस्रो गीत बजारमा ल्याएका हुन् । उनले यसअघि नयाँ दिल्ली बोलको गीतले परदेशी नेपालीहरूको मन जितेको थियो ।

{भिडियो सहित}