अखबार नेपाल ट्रेन्डिङ

काठमाडौं । नेपाल प्रिमियर लिग (एनपीएल) को तेस्रो संस्करणलाई लक्षित गर्दै एक्सट्रीम इनर्जी ड्रिङ्कले देशका ९ सहरका १० स्थानमा फ्यान जोन सञ्चालन गर्ने भएको छ । क्रिकेटप्रेमीलाई आफ्नै सहरमा बसेर प्रतियोगिताको रोमाञ्च अनुभव गराउने उद्देश्यले कम्पनीले निःशुल्क प्रवेशसहितका फ्यान जोन सञ्चालन गर्न लागेको हो । कात्तिक ९ गतेदेखि मंसिर ५ गतेसम्म आयोजना हुने एनपीएलका खेल फ्यान जोनमा राखिने ठूला एलईडी स्क्रिनमार्फत प्रत्यक्ष प्रसारण गरिनेछन् । यसले रंगशालामै पुग्न नसक्ने दर्शकलाई पनि साथीभाइसँगै बसेर खेल हेर्न, मनपर्ने टिमको समर्थनमा हुटिङ गर्न र प्रतियोगिताको उत्साह साटासाट गर्न अवसर प्रदान गर्नेछ ।

कम्पनीका अनुसार काठमाडौंको सिफल मैदान, कीर्तिपुरको माइक्रो पार्क र त्रिभुवन विश्वविद्यालय (टीयू) क्रिकेट मैदानको दोस्रो गेटअगाडिको मैदानमा फ्यान जोन सञ्चालन हुनेछन् । त्यस्तै, धनगढीको कभर्ड हल क्षेत्र, सुर्खेतको घण्टाघर डबली, बुटवलको सिद्धेश्वरी ग्राउन्ड, पोखराको मालेपाटन चौर र चितवनको वीरेन्द्र बहुमुखी क्याम्पसको डिग्री कलेज परिसरमा पनि खेलको प्रत्यक्ष प्रसारण हेर्न सकिनेछ । यसैगरी, मधेश प्रदेशको जनकपुरस्थित बाह्रबिघा चौर र कोशी प्रदेशको विराटनगरस्थित पुरानो गुद्री मैदानमा समेत फ्यान जोन स्थापना गरिनेछ । यी स्थानमार्फत एनपीएलको माहोल राजधानी र क्रिकेट मैदानमा मात्र सीमित नराखी देशका विभिन्न सहरसम्म विस्तार गर्ने कम्पनीको लक्ष्य छ ।

फ्यान जोनलाई खेल हेर्ने स्थानमा मात्र सीमित नराखी मनोरञ्जन र सामूहिक उत्सवको केन्द्र बनाउने तयारीसमेत गरिएको छ । प्रत्यक्ष प्रसारणसँगै साङ्गीतिक प्रस्तुति, मनोरञ्जनात्मक गतिविधि र रमाइला खेलकुद कार्यक्रम सञ्चालन गरिनेछन् । साथै, गिभअवे कार्यक्रममार्फत दर्शकले आकर्षक उपहार प्राप्त गर्ने अवसरसमेत पाउनेछन् । एनपीएलप्रति बढ्दो जनचासो र क्रिकेटप्रेमीको उत्साहलाई थप विस्तार गर्ने उद्देश्यले यो पहल अघि सारिएको हो । ठूलो स्क्रिनमा खेल हेर्ने, साथीभाइसँग खुसी साट्ने र सामूहिक रूपमा आफ्नो टिमको समर्थन गर्ने अवसरले फ्यान जोनलाई प्रतियोगिताको आकर्षक गन्तव्य बनाउने अपेक्षा गरिएको छ ।

मैदानमा खेलाडीबीच प्रतिस्पर्धा भइरहँदा फ्यान जोनमा समर्थकको हुटिङ, सङ्गीत र मनोरञ्जनले एनपीएलको रौनक थप्ने विश्वास गरिएको छ । क्रिकेटलाई मनोरञ्जन र सामूहिक उत्सवसँग जोड्दै एक्सट्रीमले प्रतियोगिताको माहोल देशव्यापी बनाउने प्रयास गरेको छ ।