जितेन्द्र रसिकको बालचित्र कथा ‘बेलबहादुरसँग बिहे’ सार्वजनिक
वि.सं.२०७७ पुस २९ बुधवार १७:२४
काठमाडौं: साहित्यकार जितेन्द्र रसिकको ११औं कृति बालचित्र कथा ‘बेलबहादुरसँग बिहे’ सार्वजनिक भएको छ ।
कोभिड-१९ को जोखिमलाई मध्येनजर गर्दै एडुकेशनल पब्लिशिंग हाउसका रमण राउत, शितल सुकुभटु र कथाकार जितेन्द्र रसिकले संयुक्त रुपमा लोकार्पण गरिएको हो ।
कथामा नेवारी परम्परामा आधारिक इहि संस्कृतिमा प्रयोग हुने बेललाई प्रतिक बनाएर इहि परम्परामाथि नेवार समुदायका बालिकाको जिज्ञासाको समाधान गर्न खोजिएको छ ।
बेलबहादुरसँग बिहे कथामा एकल महिलाप्रति समाजले हेर्ने दृष्टिकोण र इहि परम्पराभित्र लुकेको सामाजिक क्रान्तिका सन्दर्भ बालमनोविज्ञानमा आधारित रहेर रमाइलो तरिकाले प्रस्तुत गरिएको छ ।
कथा कृति मावि तहसम्मका बालबालिकाका लागि निकै उपयोगी रहने एडुकेशनल पब्लिशिंग हाउसका रमण राउतले बताए ।
त्यस्तै एडुकेशनल पब्लिशिंग हाउसका लेआउट डिजाइनर शितल सुकुभुटुले ‘बेलबहादुरसँग बिहे’ संवादात्मक चित्रकथा निकै रमाइलो र जति पढ्यो पढुँपढुँ लाग्ने प्रस्तुती रहेकाले पनि बालबालिकामाझ ‘बेलबहादुरसँग बिहे’ चित्रकथा लोकप्रिय हुने बतए ।
‘बेलबहादुरसँग बिहे’ चित्रकथामा वरिष्ठ चित्रकार एक्कारामसिं को चित्र रहेका छन् । चित्र कथा एडुकेशनल पब्लिशिंग हाउसले सार्वजनिक गरेको हो । कृतिको मूल्य १५० रुपैयाँ रहेको छ ।
रत्नपुस्तक भण्डार भोटाहिटीं, एडुकेशनल पब्लिशिंग हाउस जमल लगायत काठमाडौंका सबै पुस्तकपसलमा उपलव्ध गराइएको एडुकेशनल पब्लिशिंग हाउसले जनाएको छ ।
काठमाडौं बाहिर भने केहि दिनमै वितरण हुने जनाइएको छ ।
वि.सं.२०७७ पुस २९ बुधवार १७:२४