अखबार नेपाल ट्रेन्डिङ

एउटा बूढो ल्याम्पपोस्ट
कुनामा चुपचाप उभिएको छ
ऊ हेरिरहन्छ–
सडकमा खेलिरहेका बच्चाहरू
चोकमा गफ गरिरहेका थकित भरियाहरू
पल्लोघरको बरण्डामा गृहिणीहरूको गन्थन
चियापसलमा साथीभाइको भेटघाट।

त्यो बूढो ल्याम्पपोस्टमाथि
एउटा बेवारिस चङ्गा अल्झेको छ
जो आफ्नो दुर्भाग्य फरफराउँछ
त्यहाँ, एउटा बेरोजगार चरीको गुँड पनि छ
शिशिरयाममा पातहरू झरेर गएको रुखझैँ
यो रङ्ग खुइलिएको खामो
उभिन्छ गल्ली कुनामा उजाड–उजाड ।

त्यो बूढो ल्याम्पपोस्टमुनि
एउटा बौलाहा पीरव्यथाका जुम्राहरू गनेर बस्छ
एउटा भिखारी अँध्यारो ओढेर सुत्छ
एउटा कुकुर घाउहरू सुम्सुम्याउँदै रुन्छ
मध्यरातसम्म फत्फताइरहन्छ एउटा जँड्याहा
सरकारमाथिको आक्रोश ।

यही बाटो हुँदै
हुल्याहाहरू बूढो ल्याम्पपोस्टमाथि
ढुङ्गाहरू बर्साउँदै जान्छन्
बल्बहरू फुटाउँदै भाग्छन्
युद्धमा आँखा घाइते बनेको सिपाहीझैँ
झोक्रिरहन्छ फ्युज्ड चिम बोकेर ल्याम्पपोस्ट ।

अलपत्र छ अनिकालमा छोडेर गएको घरजस्तै
भूकम्पमा ध्वस्त कुनै गाउँजस्तै
नयाँ बल्ब फेरिएको छैन
नयाँ रङ्ग रङ्गाइएको छैन
ठडिएको छ यो बूढो ल्याम्पपोष्ट झैँ
समयको अँध्यारोमा मेरो देश ।