अखबार नेपाल ट्रेन्डिङ

गजल – १

किन किन मनमा अचम्मको चाल भको छ
जसो गरे पनि नहुने खै कस्को जाल भको छ ।

समस्याको समाधान गर्छु भन्दा भन्दै आज
गहिरिएर घाऊ फेरी बेहाल भको छ ।

समयले बाटो अन्तै मोड़न् थालेपछि मलाई
आफ्नै जिन्दगीको न सुर न ताल भको छ ।

जता हेर्छु उतै तिर जाल झेल गर्ने मात्र देख्छु
लाग्छ इमान्दार मान्छेको अनिकाल भको छ ।

जलस्रोतको दोस्रो धनी राष्ट्र हाम्रो देश
भ्रष्टचारीले लुटेर कति कंगाल भको छ ।

गजल – २

भर दिने रुखको ज़रा फेदै देखि मरेपछि
यस्तै भै टुट्छन् सपना अर्कैको भर परेपछि।

बिश्वासमा घात भएर आज मैले गला रेटें
दुख्ने रैछ मन मुटु काँडा जती मैं तिर झरेपछी ।

पैतलामा काँडा बिझ्दा शीर सम्म दुखे जस्तै
दुख्दों रै’छ यो मन् पनी तिमी अन्तै सरेपछि ।

बिदाईमा हात हल्लाउदै दोबाटोमा छोड्यो
गाह्रो भयो पीडा भोग्न चोखो माया गरेपछि ।

बियोगको आलो घाउमा नुनचुक छर्किनलाई
अब खबर के सोध्छौं र सात समुद्र तरेपछी ।