अखबार नेपाल ट्रेन्डिङ

काठमाडौं: नेपाल राष्ट्र बैंकले पेन्सन तथा उपदान कोषमा रहेको १ अर्ब ७८ करोड रुपैयाँ वाणिज्य बैंक, विकास बैंक र फाइनान्स कम्पनीहरूको मुद्दती निक्षेप राख्ने भएको छ ।

राष्ट्र बैंकले ‘क’ वर्गका वाणिज्य बैंकमा १ अर्ब ४२ करोड ४० लाख रुपैयाँ, ‘ख’ वर्गका विकास बैंकहरुमा २६ करोड ७० लाख रुपैयाँ र ‘ग’ वर्गका वित्त कम्पनीहरूमा ८ करोड ९० लाख रुपैयाँ गरी कूल १ अर्ब ७८ करोड रुपैयाँ लगानी गर्न लागेको हो ।

राष्ट्र बैंकको निक्षेप लिनको लागि बैंक तथा वित्तीय संस्था सञ्चालनमा आएको कम्तीमा दुई वर्ष पुरा गरेको हुनुपर्ने साथै, यी बैक तथा वित्तीय संस्थाको राष्ट्र बैंकले तोकेको न्यूनतम पूँजीकोष कायम हुनुपर्ने जनाएको छ ।

बैंकले सो रकम २०७७ कार्तिक २ गतेदेखि २०७८ जेठ ३१ गतेसम्म २४० दिनका लागि बैंक तथा वित्तीय संस्थको मुद्दती निक्षेप राख्न लागेको हो । राष्ट्र बैंकको निक्षेप लिन चाहने बैंक तथा वित्तीय संस्थाहरुले आफूले लिन चाहेको रकम तथा उक्त रकममा प्रदान गर्ने ब्याजदर समेत उल्लेख गरी असोज १८ गतेसम्ममा बोलकबोल पेश गर्नुपर्ने सूचना जारी गरेको छ । मुद्दती निक्षेपको ब्याज बैंक तथा वित्तीय संस्थाले मासिक रुपमा भुक्तानी गर्नुपर्ने शर्त राष्ट्र बैंकले राखेको छ ।

त्यसैगरी, निक्षेप लिनको लागि निष्कृय कर्जा कुल कर्जा सापटीको पाँच प्रतिशतभन्दा कम हुनुपर्ने, खुद तरल सम्पत्ति स्वदेशी निक्षेपको कम्तीमा बीस प्रतिशत वा सो भन्दा बढी रहेको हुनुपर्ने, कर्जा र स्वदेशी निक्षेप र प्राथमिक पुँजी अनुपात बैंकले समय समयमा निर्धारण गरेको सीमा भित्र रहेको हुनुपर्नेछ ।

शीघ्र सुधारात्मक कारवाहीमा परेको तथा समस्याग्रस्त घोषणा भएको भए फुकुवा भएको कम्तीमा ६ महिना पुरा भएको हुनुपर्ने राष्ट्र बैंकले सूचित गरेको छ । राष्ट्र बैंकले सर्वसाधारणको लागि छुट्याईएको शेयर जारी गरिसकेको हुनुपर्ने जस्ता शर्तहरू तोकिएको छ ।