अखबार नेपाल ट्रेन्डिङ

काठमाडौं: अन्तर्राष्ट्रिय वित्त निगम (आइएफसी)ले एनएमबि बैंकलाई कर्जा दिने भएको छ । अमेरिकी २५ मिलियन डलर कर्जाको लागि एनएमबि र आइएफसीबीच समझदारी भएको छ । एनएमबिले दुई बर्षको अवधिमा लगातार दुई पटक आइएफसीबाट कर्जा प्राप्त गर्ने नेपालको एक मात्र बैंक भएको छ । यो बैदेशिक लगानी हालको परिदृश्यमा बाणिज्य बैंकलाई प्रदान गरिएको पहिलो अन्तर्राष्ट्रिय लगानी हुनेछ ।

उक्त समझदारीमा एनएमबि बैंकका प्रमुख कार्यकारी अधिकृत सुनिल के. सी. र आइएफसीका एक्टिङ्ग रेजिडेन्ट रिप्रिजेन्टेटिभ सन्तोष पाण्डेले हस्ताक्षर गरेका छन् । यस वित्तीय समझदारीले कोभिड-१९ को कारणले आईपरेको कठिनाईहरुको बीचमा साना तथा मझौला उद्यमी वर्गको लागी आवश्यक कर्जाको आपूर्ति गर्नुको साथै र नयाँ उद्यमीलाई लगानी गर्ने भनिएको छ ।

नेपाल राष्ट्र बैंकले बैंक तथा वित्तिय संस्थालाई विदेशी बैंक तथा वित्तिय संस्थाबाट कुल पुँजीको २५ प्रतिशतसम्म लगानी ल्याउन बाटो खुला गरेपछि एनएमबिले दोस्रो पटक कर्जाका लागि हस्ताक्षर गरेको हो । एनएमबि बैंकले चालु आर्थिक वर्षको तेस्रो त्रैमाससम्म १ अर्ब ८८ करोड रुपैयाँ खुद नाफा कमाएको छ । एनएमबी बैंकले कञ्चन डेभलपमेन्ट बैंकलाई एकवाएर गर्दैछ । यसका लागि एक्वायस प्रस्ताव पारित गराउँन असार २१ मा विशेष साधाणसभा समेत बस्दैछ ।