अखबार नेपाल ट्रेन्डिङ

एजेन्सी: सोमालियाको राजधानी सहर मोगादिसुको दक्षिणपश्चिमको क्षेत्रमा कारमा राखिएको शक्तिशाली वम विस्फोट हुँदा मृत्यु हुनेको संख्या ९० जना पुगेको छ । मृत्यु हुनेमा स्थानीय विश्वविद्यालयका विद्यार्थी रहेको जनाईएको छ ।

घटनामा कम्तीमा ७० जना घाइते भएका छन् । विष्फोट सोमालियाको राजधानी सहर मोगादिसुको दक्षिणपश्चिमको चोकमा भएको हो । उक्त स्थानमा सुरक्षा जाँचका लागि खडा गरिएको अस्थायी सुरक्षा पोस्ट र कर कार्यालयसमेत रहेकोले विष्फोटमा धेरै जनाको मृत्यु भएको एक प्रहरी अधिकारीले बताएका छन् । घाइतेहरूको स्थानीय अस्पतालहरूमा उपचार भइरहेको र घाइतेमध्ये दर्जनौँको स्वास्थ्य अवस्था गम्भीर रहेकोले मृतक सङ्ख्या थप बढ्न सक्ने प्रहरीले जनाएका छन ।

घटनास्थलमा कारका टुक्राहरू रहेको सामाजिक सञ्जाल तथा टेलिभिजन मार्फत सार्वजनिक दृष्यहरूमा देख्न सकिन्छ भने सुरक्षाकर्मीहरूले घटनास्थल बरपरका क्षेत्रमा आक्रमणकारी लुकेका हुनसक्ने आशङ्कामा उनीहरूको खोजी भईरहेको जनाईएको छ । मोगादिसुमा विद्रोही अल साबाब इस्लामिक समूहले पटकपटक आक्रमण गर्दै आएको छ । प्रहरीका अनुसार घटनामा विद्यार्थी तथा टर्कीबाट सडक निर्माणका लागि खटिएका श्रमिक तथा केही इन्जिनियरहरू समेत परेका छन् ।