अखबार नेपाल ट्रेन्डिङ

काठमाडौं: भारतीय क्लब इस्ट बंगाल एफसीले दशरथ रंगशालामा जारी साफ महिला क्लब च्याम्पियनसिपमा लगातार दोस्रो जित निकालेको छ । अर्को खेलमा नेपालको लिग च्याम्पियन एपिएफ भुटानको ट्रान्सपोर्ट युनाइटेड एफसीसँग बराबरीमा रोकिएको छ ।

इस्ट बंगालले पाकिस्तानी क्लब कराँची सिटी एफसी २-० गोल अन्तरले हराये । इस्ट बंगालका लागि सुलन्जना राहुलले पाँचौं मिनेटमा र रिस्टी नानजिराले ४९ औं मिनेटमा गोल गरिन् । बिहीबार भएको दोस्रो खेलमा एपिएफले भुटानको ट्रान्सपोर्ट युनाइटेड एफसीसँग गोलरहित बराबरी खेलेको‌ छ । इस्ट बंगाल ६ अंकसहित शीर्ष र ४ अंकसहित एपिएफ दोस्रो स्थानमा छ ।

आइतबार एपिएफले कराँचीसँग तथा नसरिन स्पोर्ट्स एकेडेमीले इस्ट बंगालसँग प्रतिस्पर्धा गर्नेछ । दक्षिण एसियाका ५ राष्ट्रको लिग च्याम्पियनको सहभागिता रहेको च्याम्पियन्सिपमा सिंगल राउन्ड रोबिनका आधारमा जारी छ । शीर्ष २ टोलीले फाइनल खेल्नेछन् ।

च्याम्पियनसिपको विजेताले १० हजार अमेरिकी डलर र उपविजेताले ५ हजार अमेरिकी डलर तथा बाँकी तीन टोलीले समान २ हजार अमरिकी डलर प्राप्त गर्नेछन् । एन्फाले प्रतियोगिताको लागि दुई खालको टिकटदर कायम गरेको छ । साधारणतर्फ ३०० र भीआईपीतर्फ ५०० को टिकट मूल्य राखिएको छ ।