अखबार नेपाल ट्रेन्डिङ

काठमाडौं: चालु आर्थिक वर्ष २०८१/८२ को पाँच महिनामा वैदेशिक रोजगारीका क्रममा १९ करोड ३९ लाख ८६ हजारभन्दा बढीको ठगी भएको छ । यो विवरण वैदेशिक रोजगार विभागमा परेको उजुरीका आधारको हो । यो अवधिमा ४ हजार ८८ वटा ठगीका उजुरी दर्ता भएका छन् र तिनबाट माथि उल्लेख भएको क्षतिपूर्ति असुल भएको छ ।

मंगलबारको गोरखापत्र दैनिकमा समाचार छ, ठगीमा पर्ने अधिकांश व्यक्ति घरगाउँकै दाजुभाइ, दिदीबाहिनी, आफन्त र सहरका वैदेशिक रोजगार व्यवसायी कम्पनी, ट्राभल एजेन्सी, एजुकेसन कन्सल्टेन्सी लगायतबाट ठगिएका छन् । यो तथ्यांक उजुरीमा परेका आधारको हो तर सबै ठगिनेले उजुरी गर्दैनन् । यो आधारमा ठगीमा पर्ने अरू बढी रहेको अनुमान विभागको छ । विभागमा परेका उजुरी फर्छ्योट पनि हुने गरेका छन् । विभागका अनुसार आधाभन्दा बढी फर्छ्योट भएका छन् । चालु आव २०८१/८२ मा दर्ता भएका उजुरीमध्ये दुई हजार १११ वटा (५१.८९ प्रतिशत) फर्छ्योट गराउँदा १९ करोड ३९ लाख ८६ हजार ३० रुपैयाँ बराबर क्षतिपूर्ति भराइएको छ ।

विभागका अनुसार यो अवधिमा उजुरी परेकामध्ये सबैभन्दा धेरै प्रहरी शाखामा एक हजार ७०८ वटा छन् । जसमध्ये एक हजार ६४४ वटा उजुरी फर्छ्योट भए भने ११ वटा उजुरीमा मिलापत्र गराइएको छ । यसमा ११ लाख ५४ हजार ५०० रुपैयाँ बराबरको रकम क्षतिपूर्तिबापत भराएको विभागले जनाएको छ । प्रहरीमा दर्ता भएका ६६ वटा फर्छ्योट हुन बाँकी छन् । यसै गरी यो अवधिमा मुद्दा तथा अनुसन्धान शाखामा एक हजार ५६१ वटा उजुरीको १४ करोड ६७ लाख ६१ हजार ५३० रुपैयाँ दाबी गरिएको छ । यो शाखामा परेका उजुरीमध्ये २६० वटा उजुरीको मिलापत्र भएका छन् भने ७८ वटा उजुरी अदालतमा मुद्दा दायर भएको विभागले जनाएको छ । त्यसैगरी उद्धार, राहत तथा समन्वय शाखामा ८२० वटा उजुरी परेकामा ४७७ वटा फर्छ्योट भएका छन् । यो शाखामा यस अवधिमा परेका उजुरीमध्ये ३७६ वटा उजुरीमा चार करोड छ लाख ७० हजार रुपैयाँ पीडितलाई क्षतिपूर्ति भराइएको छ ।