अखबार नेपाल ट्रेन्डिङ

काठमाडौं: नेपाल टी-२० लिगमा ‘स्पट फिक्सिङ’ भएको निष्कर्ष केन्द्रीय अनुसन्धान ब्युरो (सीआईबी)ले निकालेको छ ।

सीआईबी प्रमुख उत्तरमराज सुवेदीले केहीविरुद्ध मुद्दा चल्ने अवस्था रहेको बताए । ‘त्यसमा खेलाडी, म्यानेजर, अफिसियल जो पनि हुन सक्छन्,’ एआईजी सुवेदीले भने । सुवेदीले स्पट फिक्सिङ विवादसम्बन्धमा भएको छानबिनबारे सोमबार प्रतिवेदन सार्वजनिक गरिने बताए ।

राष्ट्रिय टोलीका पूर्व कप्तान ज्ञानेन्द्र मल्लले आफ्नो टोलीका एक खेलाडीलाई फिक्सिङका लागि अप्रोच भएको बताएपछि प्रतियोगिता चरम विवादमा परेको थियो । प्रतियोगिता आयोजनाको जिम्मा पाएको भारतीय कम्पनी सेभेन थ्री स्पोर्ट्सका अधिकारी प्रतियोगिताको बीचमै घर फर्किएका थिए ।

प्रतियोगितामा सहभागी सबै ६ टोलीका खेलाडीले पारिश्रमिक पाएका छैनन् । एक खेलाडीका अनुसार नेपाल क्रिकेट संघ (क्यान)ले ६ महिनाभित्र पारिश्रमिक उठाई दिने प्रतिबद्धता जनाएको छ ।

टेन्डर प्रकृया बिना सेभेन थ्री स्पोर्ट्सलाई नेपाल टी-२० आठ वर्षका लागि आयोजना गर्न दिइएपछि सुरुवातदेखि नै यो प्रतियोगिता विवादमा परेको थियो । सीआईबीले स्पट फिक्सिङमा संलग्न रहेकाको नाम गोप्य राखेको छ ।

प्रतियोगितामा एन्टी करप्सन हेरिरहेको युनिटले उनीहरुलाई स्पट फिक्सिङबारे रिपोर्ट गरेको थियो । प्रतियोगिता दौरान शंकास्पद व्यवहार गर्नेलाई तत्कालै जिम्मेवारीबाट हटाइएको क्यानको दावी छ । सीआईबी स्रोतका अनुसार सेभेन थ्री स्पोर्टसका अधिकारीविरुद्ध पनि मुद्द चल्न सक्ने स्थिति रहेको छ ।