अखबार नेपाल ट्रेन्डिङ

काठमाडौं: माघ ७ गते हुने उपसभामुख निर्वाचनका लागि नेपाली कांग्रेसको पदाधिकारी बैठक सभापति शेरबहादुर देउवाको निवास धुम्बाराहीमा बसेको छ ।

उपसभामुख निर्वाचनका लागि आज दिउँसो १ बजेदेखि अपरान्ह ४ बजेसम्म उम्मेदवारी दर्ताको समय दिइएको छ । पार्टीबाट उपसभामुखमा उम्मेदवारी दिने कि नदिने, उम्मेदवारी दिँदा कसलाई अघि सार्ने भन्ने विषयमा सभापति देउवाले पदाधिकारीका सुझाव लिइरहेका छन् ।

कांग्रेसले सांसद ईश्वरीदेवी न्यौपानेलाई सभामुख उम्मेदवार बनाएको थियो । न्यौपानेलाई एकीकृत समाजवादी, लोसपा र राष्ट्रिय जनमोर्चाले पनि समर्थन गरेका थिए । बिहीबार भएको निर्वाचनमा उनी पराजित भइन् भने सत्ता साझेदार दलको समर्थनमा नेकपा एमालेका सांसद देवराज घिमिरे सभामुख चयन भएका थिए ।

कांग्रेसले एकीकृत समाजवादी, लोसपा र राष्ट्रिय जनमोर्चासँग पनि छलफल गरी उम्मेदवार तय गर्ने तयारी गरेको छ । सत्ता साझेदार दलभित्र भने उपसभामुख पदमा राष्ट्रिय स्वतन्त्र पार्टीबाट उम्मेदवार हुने सम्भावना छ । उक्त पार्टीको संसदीय दल बैठकले इन्दिरा राना मगरलाई उपसभामुख पदमा उठाउने निर्णय गरेको छ ।

सत्ता गठबन्धन र कांग्रेस नेतृत्वको गठबन्धनका उम्मेदवारबीच शनिबार दिउँसो १ बजे प्रतिनिधि सभामा उपसभामुखमा प्रतिस्पर्धा हुने सम्भावना देखिएको छ ।