अखबार नेपाल ट्रेन्डिङ

काठमाडौं: सिंगापुरमा हुने आईसीसी टी-ट्वान्टी विश्वकप एसिया फाइनलको तयारीका लागि मलेसियामा रहेको नेपाली राष्ट्रिय क्रिकेट टोलीले आजदेखि घरेलु टोलीसँग दुई खेलको टी-ट्वान्टी अन्तराष्ट्रिय क्रिकेट सिरिज खेल्दैछ ।

क्वालालम्पुरस्थित किनरारा ओभलमा नेपाल र मलेसियाबीचको खेल आज नेपाली समय अनुसार बिहान पौने ८ बजे सुरु हुनेछ । दोस्रो खेल नेपालले आइतबार मलेसियासँग खेल्नेछ । हालसम्म टी-ट्वान्टीमा नेपाल र मलेसियाबीच ४ पटक प्रतिस्पर्धा भएको छ । जसमा नेपाल हाबी रहेको छ ।

चार खेलमध्ये नेपालले तीन खेलमा जित हात पारेको छ । दुई खेलको सिरिजपछि नेपाली टोली मलेसियाबाटै सिंगापुर प्रस्थान गर्नेछ । सन् २०२० मा अष्ट्रेलियामा हुने विश्वकप क्रिकेटको एसिया फाइनल छनोट जुलाई २२ देखि २८ सम्म सिंगापुरमा हुँदैछ । एसिया फाइनलमा नेपालसहित आयोजक सिंगापुर, मलेसिया, कतार र कुवेत रहेका छन् ।