अखबार नेपाल ट्रेन्डिङ

काठमाडौं: तीन दिनदेखिको वर्षापछि आएको बाढी र पहिरोमा परी देशभर ४३ जनाको मृत्यु भएको छ भने २४ जना बेपत्ता छन् ।

पछिल्लो तथ्याक अनुसार ललितपुर, भोजपुरमा, खोटाङ, काठमाडौं, काभ्रे, धादिङमा, झापा, सिन्धुली, रामेछाप, ओखलढुंगा, मकवानपुर, रुकुम पश्चिम, महोत्तरी, बारा र पर्सामा बाढी र पहिरोबाट २० जिल्ला बढी प्रभावित भएको गृहमन्त्रालयले जनाएको छ । उपत्यकाका अधिकांश ठाउँ, पूर्वी र मध्य तराईका धेरैजसो जिल्ला डुबानमा परेका छन् भने बाढी र पहिरोले दर्जनौं ठाउँमा यातायात अवरुद्ध भएको छ ।

राजधानी जोड्ने विभिन्न राजमार्गमा पहिरो जाँदा काठमाडौंबाट बाहिरिएका र भित्रिने हजारौ यात्रु अलपत्र परेका छन । डुबानका कारण तराईका जिल्लामा खानेपानीको समस्या हुन थालेको गृह मन्त्रालयले जनाएको छ । अविरल पानी परिरहँदा नदी र खोलाहरूमा बहाव बढ्दै गइरहेको छ ।

यसैबीच सप्तकोशी नदीमा पानीको स्तर उच्च भई पुललाई नै खतरा भएपछि कोशी व्यारेज कन्ट्रोल रुमले ५६ वटै ढोका खुल्ला गरेको छ । गएराती १० बजे नेपाल पक्षको अनुरोधमा भारतले सबै ढोका खुल्ला गरेको भण्डाटावारीस्थित सशस्त्र प्रहरी वलका इन्स्पेक्टर सुरेन्द्र भण्डारीले जानकारी दिए । राती ९ बजेको मापन अनुसार पानीका वहाव ३ लाख ७१ हजार एक सय १० क्यूसेक पुगेको छ ।

पानी निरन्तर परिरहेकाले कोशीको जलस्तर बढ्दोक्रममा रहेको उनले बताए । कोशीको पानीको वहाव मापनको कन्ट्रोल भारतको हातमा रहेको छ । बढि ढोका खोल्दा विहारका जिल्ला ढुवानमा पर्ने भन्दैं भारतले विगत बर्षहरुमा सबै ढोका खोल्न मान्दैंन थियो । ५६ वटै ढोका खोल्न भारत तयार भएको पहिलो पटक हो ।