अखबार नेपाल ट्रेन्डिङ

एजेन्सी: अमेरिकाले अफगानिस्तानमा गरेको सैन्य हस्तक्षेप अन्त्य गर्दै अमेरिकी सेना बगराम एयरबेसबाट  अमेरिका फर्किएको छ ।

गत शुक्रबार बिहान ३ बजेतिर अमेरिकी सेनाले बगराम छाडेको जानकारी अफगान सेनाका जनरल असदुल्ला कोहिस्तानीले दिएका हुन् ।

बीबीसीका अनुसार अफगानी सुरक्षा बलले अमेरिकी सेना बगरामबाट हटेको जानकारी केही घण्टापछि मात्रै प्राप्त गरेको थियो ।

बगराममा एक जेल पनि छ, जहाँ पाँच हजारजति तालिबानी विद्रोहीलाई कैद गरिएको अनुमान छ ।

अमेरिकी सेना अफगानिस्तानबाट फर्किएलगत्तै तालिबानले त्यहाँ निकै तीव्र गतिमा इलाकाहरू कब्जा गर्न थालेको छ ।

शुक्रबार अमेरिकाले बगराम एयरबेस खाली गरेको जानकारी दिएको थियो । सो कदमसाथ अफगानिस्तानमा अमेरिकी सैन्य अभियान अन्त भएको हो ।

राष्ट्रपति जो बाइडेनले सेप्टेम्बर ११ अघि नै अमेरिकी सेनालाई अफगानिस्तानबाट फर्काइने बताएका थिए ।

समाचार एजेन्सी एपीका अनुसार अमेरिकी सेनाले हजारौं सवारीसाधन र सयौं बख्तरबन्द गाडी पनि त्यत्तिकै छाडिदिएका छन् ।

तर, अमेरिकीहरूले भारी हातहतियार लगेका छन् भने गोलाबारुद राखिएका केही भण्डार जलाइदिएका छन् । केही थान छोटा हातहतियार र गोलाबारुद भने छाडेका छन् ।