अखबार नेपाल ट्रेन्डिङ

काठमाडौं: “नेपाल आइडल सिजन-३” ले उपाधि भिडन्तका लागि उत्कृष्ट ३ प्रतिस्पर्धी पाएको छ ।

गत भदौबाट अडिसन सुरु भएको ‘नेपाल आइडल सिजन-३’ ले गत चैत्र महिनाभित्र मै आफ्नो नयाँ आइडल पाइसक्नु पर्ने थियो ।

तर विश्वभर महामारीको रुपमा फैलिएको कोरोना भाइरसको प्रकोपले गर्दा आइडल प्रभावित भएको थियो ।

गत चैत ११ गतेदेखि देशभर लकडाउन भएपछि साउनमा लकडाउन केही खुकुलो भएसँगै पुनः सञ्चालनमा आएको आइडलको फाइनल यहि साता हुने भएको छ ।

यस सिजनको उपाधिको होडमा मोहत्तरी बर्दिबासका किरण भुजेल, मोरङकी सज्जा चौलागाँई र बर्दियाका प्रवीन भेटवाल रहेका छन् ।

तीनै जनाको फरक फरक गायकी शैली भएका कारण यस पटकको प्रतिस्पर्धा थप रोचक हुने अनुमान गरिएको छ ।

फरक फरक विशेषता र प्रतिभा भएका उत्कृष्ट ३ मध्ये यसपटक विजेता को बन्ने हो ? त्यो थाहा पाउनका लागि भदौ १२ गते सम्म पर्खनुपर्ने भएको छ ।

यसका लागि आइडलले भदौ १२ गते शुक्रबार बेलुका ५ बजेसम्म आफ्नो मनपर्ने प्रतिस्पर्धीलाई विजेता बनाउन भोटिङ गर्ने समय निर्धारण गरेको छ ।

कोरोनाको प्रकोपको कारण यस पटकको नेपाल आइडलको फाइनल भदौ १२ गते आफ्नै स्टुडियोबाट हुने जानकारी प्राप्त भएको छ ।