अखबार नेपाल ट्रेन्डिङ

काठमाडौं: नेपाल कम्युनिष्ट पार्टीका अध्यक्ष एवं प्रधानमन्त्री केपी शर्मा ओलीले आफूलाई पद त्याग्न दबाब दिइरहेका बेला तेस्रो विकल्पका लागि नयाँ प्रस्ताव पेश गरेका छन् । पार्टीभित्रको विवाद समाधान गर्न भन्दै ल्याइएको प्रस्तावमा माधव नेपाललाई तेस्रो अध्यक्ष बनाउने र वामदेव गौतमलाई प्रधानमन्त्री बनाउने प्रस्ताव नेताहरु समक्ष पेस गरेका छन् ।

पार्टी सचिवालयको बुधबार बसेको बैठकमा चौथो वरियताका नेता नेपाललाई अध्यक्ष बनाउन तयार रहेको ओलीले बताएका हुन् । गौतमलाई प्रधानमन्त्री बनाउनका लागि संविधानसम्म पनि संशोधन गर्न आफू तयार भएको उनले बताएका थिए । त्यसका लागि गौतमलाई राष्ट्रिय सभामा लैजाने र राष्ट्रिय सभा सदस्य पनि प्रधानमन्त्री बन्न मिल्ने गरी संविधान संशोधन गर्न आफू तयार भएको बताएको स्रोतको दावी छ ।

पूर्वएमाले एकै ठाउँमा रहनुपर्ने भन्दै ओली पक्षीय नेताहरुले नेपाल र गौतमलाई यसअघि पनि यो विकल्पमा जान सकिने सुझाव दिएका थिए । तर ओलीको यस प्रस्तावलाई अरु नेताले खासै महत्व नदिएको बताईएको छ । ओलीको प्रस्तावले समाधान दिन गाह्रो हुने बुझाई अरु नेताको छ । गौतमलाई प्रधानमन्त्री बनाउने प्रस्ताव संविधान संशोधनसँग सम्बन्धित रहेको र आफूसँग दुई तिहाई नभएको अवस्थामा यो सम्भव नभएको नेताहरुको भनाइ छ ।

तेस्रो अध्यक्षमा नेपाललाई ल्याउँदा वरियतामा माथि रहेका अर्का नेता झलनाथ खनाललाई मनाउनुपर्ने देखिन्छ ।