अखबार नेपाल ट्रेन्डिङ

काठमाडौं: सत्तरुढ दल नेपाल कम्युनिष्ट पार्टी (नेकपा)भित्र केन्द्र र प्रदेश तहमा बेमेलताको ऐंजेरु यतिसम्म पलाएको छ कि त्यो हिजोको काण्डले नै प्रष्ट पारेको छ ।

हिजो नेकपाकै सांसदहरुले कर्णाली प्रदेशका मुख्यमन्त्री तथा नेपाल कम्युनिस्ट पार्टी (नेकपा)का कर्णाली प्रदेश संसदीय दलका नेता महेन्द्रबहादुर शाहीविरुद्ध अविश्वसको प्रस्ताव दर्ता गरेपछि नेकपाभित्र पलाएको ऐंजेरु छरप्रस्ट भएको हो ।

हुन त यसभन्दा अगाडी पनि केन्द्रमा पनि नेकपा अध्यक्षद्वय केपी शर्मा ओली र पुष्पकमल दाहालबीच देखिएको बेमेलताले पार्टीभित्र आन्तरिक किचलो छरपष्ट भएको प्रष्टिन्छ ।

केन्द्रबाट शुरु भएको बेमेलता अहिले प्रदेशमा पनि देखिएको छ । जुन स्वभाविक पनि हो । कर्णलीबाट शुरु भएको किचलो अब बागमतिमा आउने भएको छ ।

शक्ति प्रदर्शनमा आपसी जुंगाको लडाईले सिंगो देश र जनतालाई अनिर्णयको बन्दी बनाउनु हुन्न भन्ने आम मान्यता छ । तर अहिले त्यही कुराको रिर्हसल नेकपाभित्र भईरहेको छ । जुन निकै घातक बन्दै गएको छ ।

विश्वभर महामारीको रुपमा फैलिएको कोभिड-१९ अर्थात कोरोना भाइरसले आहत भईरहेका नेपाली जनता अब नेकपाभित्र देखिएको कोपभाजनले अझ कति आक्रान्त हुनुपर्ने हो त्यो भने हेर्न बाँकी छ ।

यतिखेर कोरोनाका कारण सर्वसाधारण जनताले उपचार समेत नपाई सडकमा भौतारिरहेको आम सञ्चारमाध्यमहरुमा समाचार देख्न र पढ्न पाएका छौ । यस्तो विषम् परिस्थितिमा मदन भण्डारीको जनताको बहुदलीय जनवादबाट निर्देशित पार्टी जनताप्रति समर्पित हुनुपर्ने हो । तर, यहाँ त्यो सिद्धान्त कुन चराको नाम हो भन्ने अवस्थामा पुर्याउन थालिएको छ ।

खाना र उपचारको अभावमा आफ्नो जीवन गुजारिरहेका गरिव जनताको आशा र भरोसामाथि नेकपा सरकारले खेलाची गरेको दृश्य अहिले स्पष्ट देखिएको छ ।

नेपालीहरुको महान चाड दशैं, तिहार छठ नजिकिदै गर्दा चाडपर्व मनाउनको लागि कार्य क्षेत्रबाट घर फर्कन सक्ने स्थिति छैन । सरकारले जो जहाँ छ त्यही बसेर चाड मनाउन आग्रह गरिरहँदा कोरोनाको सूचक झन उकालो लागिरहेको छ ।

यस्तो अवस्थामा दशैं कसरी मनाउने मनमा अमन चयन नै नभएपछि हर्षको सट्टा झन पिडा थपिने अवस्था आएको छ ।

यस्तो अवस्थामा नेकपा पार्टीभित्र देखिएको किचलोले राष्ट्रिय रुपमै प्रभाव सिर्जना गरेको छ । पार्टीभित्र र सत्ताभित्र भैरहेको शक्ति संघर्षले निस्कने विषाक्त परिणामले अझ कति पिडा जनताले भोग्नुपर्ने हो त्यो पनि हेर्न र भोग्न बाँकी छ ।

शक्ति प्रदर्शनमा आपसी जुंगाको लडाईले सिंगो देश र जनतालाई अनिर्णयको बन्दी बनाउनु हुन्न भन्ने आम मान्यता छ । तर अहिले त्यही कुराको रिर्हसल नेकपाभित्र भईरहेको छ । जुन निकै घातक बन्दै गएको छ ।

नेकपाभित्र विशेष गरी ओली, दाहाल र बरिष्ठ नेता माधव कुमार नेपालबीचको बेमेलताले पार्टीभित्र जहिल्यै किचलो हुने गरेको छ । उनीहरुबीचकै लडाईका कारण आम जनताहरुले दुई तिहाईको सरकार भएको देखिए पनि भित्री मनदेखि अनुभूति गर्न पाएका छैनन् ।

कर्णाली प्रदेशका मुख्यमन्त्री महेन्द्रबहादुर शाहीपछि अब बागमती प्रदेशका मुख्यमन्त्री डोरमणी पौडेल यसको शिकार हुने कुरा आएको छ । यो पक्कै पनि राम्रो संकेत भने होईन । पार्टी र देशलाई बिगार्ने खालको माकुराको जालो बेलैमा नफाले यसको दुष्परिणामले निम्त्याउने खतरा कति हुने हो अडकल गर्न सजिलो छैन । यसबारे नेतृत्वले बेलैमा बिचार गर्नु आवश्यक छ ।