अखबार नेपाल ट्रेन्डिङ

काठमाडौं: नेपालमा आजदेखि कोरोना भाइरसविरूद्धको खोप अभियान सुरू हुँदैछ ।

बिहान १० बजे प्रधानमन्त्री केपी शर्मा ओलीले भर्चुअल रूपमा खोपको शुभारम्भ गर्ने कार्यक्रम छ । प्रधानमन्त्री ओली खोप कार्यक्रम शुभारम्भ गरे पनि खोप भने लगाउने छैनन् ।

प्रधानमन्त्री ओलीले राजधानी काठमाडौं उपत्यकाका ११ अस्पतालमा सुरु हुने खोप अभियानको अनलाइनमार्फत प्रत्यक्ष अवलोकन गर्नेछन् ।

स्वास्थ्य मन्त्रालयको कोभिडविरुद्धको इन्सिडेन्ट कमाण्ड सिस्टमका प्रमुख डाक्टर गुणराज लोहनीका अनुसार उपत्यकाका ११ अस्पतालका स्वास्थ्यकर्मीलाई खोप लगाएपछि बिहान ११ बजेदेखि देशैभरका अस्पतालबाट खोप कार्यक्रम सुरु गरिनेछ ।

स्वास्थ्य सेवा विभाग खोप शाखाका निर्देशक डा. झलक शर्मा गौतमका अनुसार पहिलो खोप भने टेकुस्थित शुक्रराज ट्रपिकल तथा सरुवा रोग अस्पतालका निर्देशक डा. सागर राजभण्डारीले लगाउने छन् ।

त्यसलगत्तै वीर अस्पताल, आयुर्वेद अनुसन्धान तथा तालिम केन्द्र अस्पताल, कीर्तिपुर, पाटन अस्पताल, परोपकार प्रसूति तथा स्त्री रोग अस्पताल, त्रिवि शिक्षण अस्पताल, भक्तपुर अस्पताल, शहीद धर्मभक्त अंग प्रत्यारोपण केन्द्र, काठमाडौं मेडिकल कलेज, जोरपाटी, सशस्त्र प्रहरी अस्पताल, बलम्बु, शहीद गंगालाल अस्पतालका चिकित्सक/स्वास्थ्यकर्मीले एकैपटक खोप लगाउनेछन् ।

पहिलो चरणमा कोरोना महामारी रोकथामका लागि अग्रपंक्तिमा खटिएका ४ लाख ३० हजार जनालाई खोप लगाइने कार्यक्रम छ ।